Read nynorsk 1938 Paulus' fyrste brev til korintarane 4 Bible Online

Paulus' fyrste brev til korintarane 4 - nynorsk 1938 bible

Paulus' fyrste brev til korintarane 4

¹So skal de då halda oss for Kristi tenarar og hushaldarar yver Guds løyndomar!

²Elles vert det kravt av hushaldarar at dei må verta funne true.

³Men for meg hev det lite på seg å verta dømd for dykk eller av ein menneskjeleg domstol; ja, eg dømer ikkje meg sjølv di heller;

⁴for vel veit eg ingen ting med meg sjølv, men med det er eg ikkje rettferdiggjord; men den som dømer meg, er Herren.

⁵Døm difor ikkje nokon fyre tidi, fyrr Herren kjem, han som og skal føra fram i ljoset det som er dult i myrkret, og openberra rådene i hjarto; og då skal kvar og ein få si ros av Gud.

⁶Dette, brør, hev eg yverført på meg sjølv og Apollos for dykkar skuld, so de må læra av oss at ein ikkje skal ganga ut um det som skrive stend, so ingen av dykk skal blåsa seg upp, for den eine i mot den andre.

⁷For kven gjev vel deg fyremun? Og kva hev du, som du ikkje hev fenge? Men um du no og hev fenge noko, kvi rosar du deg då som um du ikkje hadde fenge det?

⁸De hev alt vorte mette; de hev alt vorte rike; utan oss hev de vorte herrar! Ja, gjev de hadde vorte herrar, so me kunde vera herrar saman med dykk!

⁹For eg tykkjer at Gud hev synt oss apostlar fram som dei ringaste, som dømde frå livet; for me hev vorte til eit skodespel for verdi, både for englar og for menneske.

¹⁰Me er dårar for Kristi skuld, men de er kloke i Kristus; me er veike, men de er sterke; de er heidra, men me ærelause.

¹¹Alt til denne stund er me både hungrige og tyrste og nakne og slegne og heimlause og mødde,

¹²med di me arbeider med våre eigne hender; me vert utskjelte - og me velsignar; me vert forfylgde - og me tek det med tol;

¹³me vert spotta - og me påminner; me hev vorte som avrak i verdi, utskot for alle til denne stund.

¹⁴Eg skriv ikkje dette til vanæra for dykk, men av di de er mine kjære born, påminner eg dykk.

¹⁵For um de hev ti tusund læremeistrar i Kristus, so hev de då ikkje mange feder; for i Kristus Jesus hev eg avla dykk ved evangeliet.

¹⁶Eg legg dykk difor på hjarta: Vert mine etterfylgjarar!

¹⁷Difor sende eg dykk Timoteus, som er mitt kjære og trufaste barn i Herren, so han skulde minna dykk um mine vegar i Kristus, soleis som eg lærer alle stader hjå kvar kyrkjelyd.

¹⁸Men sume hev blåse seg upp, men di dei tenkte at eg ikkje skulde koma til dykk.

¹⁹Men eg kjem til dykk snart, um Herren vil, og fær då læra å kjenna ikkje ordi, men krafti hjå dei som er uppblåsne.

²⁰For Guds rike stend ikkje i ord, men kraft.

²¹Kva vil de? Skal eg koma til dykk med ris eller med kjærleik og mjuklyndt ånd?