Read nynorsk 1938 Paulus' fyrste brev til korintarane 6 Bible Online

Paulus' fyrste brev til korintarane 6 - nynorsk 1938 bible

Paulus' fyrste brev til korintarane 6

¹Vågar nokon av dykk, når han hev sak mot ein annan, å søkja dom hjå dei urettferdige og ikkje hjå dei heilage?

²Eller veit de ikkje at dei heilage skal døma verdi? Og dersom verdi vert dømd av dykk, er de då uverdige til å døma i dei minste saker?

³Veit de ikkje at me skal døma englar, og då vel mykje meir i timelege ting?

⁴Når de då hev saker um timelege ting, so set de dei til domarar som er vanvyrde i kyrkjelyden!

⁵Til skam for dykk segjer eg det. So finst det då ingen vis mann hjå dykk, ikkje ein einaste, som kann skilja tretta for bror sin?

⁶Men bror fører sak mot bror, og det endå for vantruande domarar!

⁷Det er no det heile eit tap for dykk at de hev saker med kvarandre. Kvi lid de ikkje heller urett? Kvi toler de ikkje heller uskil?

⁸Men de gjer urett og uskil, og det endå mot brør!

⁹Eller veit de ikkje at dei urettferdige ikkje skal erva Guds rike? Far ikkje vilt! Korkje lauslevande eller avgudsdyrkarar eller horkarar eller slike som let seg bruka til synd mot naturi, eller slike som sjølve gjer sovori synd,

¹⁰eller tjuvar eller havesjuke eller drikkarar eller baktalarar eller røvarar skal erva Guds rike.

¹¹Og slike var sume av dykk; men de hev late dykk två, de er helga, de er rettferdiggjorde i Herren Jesu namn og i vår Guds Ande.

¹²Alt hev eg lov til, men ikkje alt gagnar; alt hev eg lov til, men eg skal ikkje lata noko få makt yver meg.

¹³Maten er for magen, og magen for maten; og Gud skal gjera ende både på den eine og den andre. Men lekamen er ikkje for hor, men for Herren og Herren for lekamen;

¹⁴og Gud vekte upp Herren og skal og vekkja oss upp ved si kraft.

¹⁵Veit de ikkje at lekamen dykkar er Kristi lemer? Skal eg då taka Kristi lemer og gjera dei til lemer åt ei skjøkja? Langt ifrå!

¹⁶Eller veit de ikkje at den som held seg til skjøkja, er EIN lekam med henne? For det er sagt: Dei tvo skal vera eitt kjøt.

¹⁷Men den som held seg til Herren er EI ånd med han.

¹⁸Fly hor! All synd som eit menneske kann gjera, er utanfor lekamen, men den som gjer hor, syndar imot sin eigen lekam.

¹⁹Eller veit de ikkje at lekamen dykkar er eit tempel for den Heilage Ande, som bur i dykk, han som de hev frå Gud, og at de ikkje er dykkar eigne?

²⁰For de er dyrt kjøpte. Æra då Gud i dykkar lekam!