Read nynorsk 1938 Paulus' andre brev til korintarane 6 Bible Online

Paulus' andre brev til korintarane 6 - nynorsk 1938 bible

Paulus' andre brev til korintarane 6

¹Men som medarbeidarar legg me dykk og på hjarta at de ikkje til unyttes må taka imot Guds nåde.

²For han segjer: I den tid som meg tektest, bønhøyrde eg deg, og på frelsedagen hjelpte eg deg. Sjå, no er det tid som tekkjest vel, sjå, no er det frelsedagen!

³Og me gjev ikkje meinstøyt i nokon ting, so ikkje tenesta skal verta lasta,

⁴men i alt viser me oss som Guds tenarar: ved stort tolmod i trengslor, i naud, i hugverk,

⁵under slag, i fengsel, i upprør, i strengt arbeid, i vaking, i fasta;

⁶ved reinleik, ved skynsemd, ved langmod, ved godleik, ved den Heilage Ande, ved uskrymta kjærleik,

⁷med sannings ord, med Guds kraft, med rettferds våpen på høgre og vinstre sida;

⁸i æra og vanæra, med lastord og lovord, som villførande og endå sannferdige,

⁹som ukjende og endå velkjende, som døyande, og sjå, me lever! som dei som vert refste, men ikkje ihelslegne,

¹⁰som syrgjande, men alltid glade, som fatige, som like vel gjer mange rike, som dei som inkje hev og endå eig alt.

¹¹Vår munn er upplaten mot dykk, korintarar, vårt hjarta hev vidka seg ut.

¹²De hev ikkje trongt rom hjå oss, men det er trongt i dykkar hjarto.

¹³Men til likt vederlag - eg talar som til born -: vidka de og ut dykkar hjarto!

¹⁴Gakk ikkje i framandt åk med vantruande! For kva samlag hev rettferd med urett? eller kva samfund hev ljos med myrker?

¹⁵Og kva samklang er det millom Kristus og Belial? eller kva lut hev ein truande med ein vantruande?

¹⁶Og kva semja hev Guds tempel med avgudar? For me er den levande Guds tempel, som Gud sa: Eg vil bu og ferdast millom dei, og eg vil vera deira Gud, og dei skal vera mitt folk.

¹⁷Difor, gakk ut frå dei og skil dykk frå dei, segjer Herren, og rør ikkje noko ureint, so skal eg taka imot dykk,

¹⁸og eg skal vera ein far for dykk, og de skal vera mine søner og døtter, segjer Herren, den Allmektige.