Read nynorsk 1938 Paulus' andre brev til korintarane 9 Bible Online

Paulus' andre brev til korintarane 9 - nynorsk 1938 bible

Paulus' andre brev til korintarane 9

¹For å skriva til dykk um hjelpi til dei heilage, det treng eg ikkje;

²for eg kjenner dykkar viljuge hug, som eg rosar dykk for hjå makedonarane, med di eg segjer: Akaia hev vore reidugt alt frå i fjor; og ihugen dykkar tilskunda so mange andre.

³Men eg sender brørne, so ikkje vår ros yver dykk skal verta til inkjes i dette stykket; for, som eg fyrr hev sagt, eg vil at de skal vera reiduge,

⁴so me - um eg ikkje skal segja de sjølve - ikkje skal få skam av denne tiltrui når det kjem makedonarar med meg og finn dykk uferdige.

⁵Difor fann eg det naudsynleg å telja brørne til å fara i fyrevegen til dykk og fyreåt skipa til den gåva som de fyrr hev lova, so at ho kann vera ferdig som ei velsigning, og ikkje som ei karg gåva.

⁶Men det segjer eg: Den som sparleg sår, skal og sparleg hausta, og den som sår med velsigningar, skal og hausta med velsigningar.

⁷Kvar gjeve so som han set seg fyre i hjarta, ikkje med sut eller av tvang! For Gud elskar ein glad gjevar.

⁸Og Gud er mektig til å gjeva dykk all nåde i rikt mål, so de i alle ting alltid kann hava all nøgd og vera rike til all god gjerning,

⁹som skrive stend: Han strøydde ut, han gav dei fatige; hans rettferd vert verande i all æva.

¹⁰Og han som gjev såmannen såkorn og brød til å eta, han skal og gjeva dykk sæde og lata det aukast og gjeva vokster til fruktene av dykkar rettferd,

¹¹med di de i alt vert rike til all ærleg kjærleik, som ved oss verkar takk til Gud.

¹²For den hjelpi de gjev med denne tenesta, råder ikkje berre bot på naudi hjå dei heilage, men ber og rik frukt med takk til Gud ifrå mange;

¹³for ved det hjartelaget som denne hjelpi syner, kjem dei til å prisa Gud for dykkar lydnad til å sanna Kristi evangelium og for den ærlege kjærleiken som syner seg i dykkar samfund med dei og med alle,

¹⁴med di dei og på si sida bed for dykk og lengtar etter dykk for den Guds nåde som er so ovrik yver dykk.

¹⁵Gud vere takk for si usegjelege gåva!