Read nynorsk 1938 Paulus' brev til galatarane 5 Bible Online

Paulus' brev til galatarane 5 - nynorsk 1938 bible

Paulus' brev til galatarane 5

¹Til fridom hev Kristus frigjort oss; statt difor støde, og lat dei ikkje få dykk inn att under trældoms åk!

²Sjå, eg, Paulus, segjer dykk at um de let dykk umskjera, so vil Kristus inkje gagna dykk.

³Atter vitnar eg for kvart menneske som let seg umskjera, at han hev skyldnad på seg til å halda heile lovi.

⁴De som vil verta rettferdiggjorde ved lovi, de er skilde frå Kristus, de er falne ut or nåden.

⁵For i trui ventar me i Anden på det som rettferdi gjev oss von um;

⁶for i Kristus Jesus gjeld korkje umskjering eller fyrehud noko, men berre tru som er verksam igjenom kjærleik.

⁷De heldt godt fram; kven hindra dykk frå å lyda sanningi?

⁸Denne yverteljingi kjem ikkje frå han som kalla dykk.

⁹Ein liten surdeig syrer heile deigen.

¹⁰Eg hev den tiltrui til dykk i Herren at de inkje anna vil tenkja; men den som forviller dykk, han skal bera sin dom, kven han so er.

¹¹Men eg, brør - um eg enno forkynner umskjering, kvi vert eg endå forfylgd? då er vel krossens støytestein burtteken.

¹²Gjev dei jamvel måtte skjera seg sjølve sund, dei som eggjar dykk upp!

¹³For de vart kalla til fridom, brør; bruk berre ikkje fridomen til høve for kjøtet, men ten kvarandre i kjærleik!

¹⁴For heile lovi er uppfyllt i eitt bod, i dette: Du skal elska næsten din som deg sjølv!

¹⁵Men dersom de bit og et kvarandre, so sjå til at de ikkje et kvarandre upp!

¹⁶Men eg segjer: Ferdast i Anden, so skal de ikkje fullføra kjøtsens lyst!

¹⁷For kjøtet er huga tvert imot Anden, og Anden imot kjøtet; dei stend imot kvarandre, so de ikkje skal gjera det som de vil.

¹⁸Men dersom de vert drivne av Anden, då er de ikkje under lovi.

¹⁹Men kjøtsens gjerningar er openberre, slike som: utukt, ureinskap, lauslivnad,

²⁰avgudsdyrking, trolldom, fiendskap, kiv, ovund, vreide, usemja, tvidrag, sundringar,

²¹misunning, mord, drykk, svir og meir slikt; um dette segjer eg dykk fyreåt, likesom eg fyrr hev sagt, at dei som fer med slikt, skal ikkje erva Guds rike.

²²Men Andens frukt er kjærleik, gleda, fred, langmod, mildskap, godleik, truskap, spaklynde, fråhald;

²³mot slike er ikkje lovi.

²⁴Men dei som høyrer Kristus Jesus til, dei hev krossfest kjøtet med fysnone og lystene.

²⁵Lever me i Anden, so lat oss og ferdast i Anden!

²⁶Lat oss ikkje hava hug til fåfengd æra, so me eggjar kvarandre og ovundar kvarandre!