Read nynorsk 1938 Paulus' brev til efesarane 1 Bible Online

Paulus' brev til efesarane 1 - nynorsk 1938 bible

Paulus' brev til efesarane 1

¹Paulus, Jesu Kristi apostel ved Guds vilje - til dei heilage i Efesus, som trur på Kristus Jesus:

²Nåde vere med dykk og fred frå Gud vår Fader og Herren Jesus Kristus!

³Lova vere Gud og vår Herre Jesu Kristi Fader, han som hev velsigna oss med all åndeleg velsigning i himmelen i Kristus,

⁴liksom han valde oss ut i han fyrr verdi vart grunnlagd, so me skulde vera heilage og ulastande for hans åsyn,

⁵med di han i kjærleik fyreåt etla oss til barnekår hjå seg sjølv ved Jesus Kristus etter sin viljes frie rådgjerd,

⁶til lov for sin herlege nåde, som han gav oss i han som han elskar.

⁷I han hev me utløysingi ved hans blod, forlating for syndene, etter rikdomen av hans nåde,

⁸som han gav oss rikleg i og med all visdom og alt vit,

⁹med di han kunngjorde oss løyndomen um sin vilje etter si frie rådgjerd, som han tok med seg sjølv

¹⁰um eit hushald han vilde skipa når tidene var fullkomne: at han atter vilde sameina alt til eitt i Kristus, både det som er i himmelen og det som er på jordi.

¹¹I han hev me og fenge arvlut, etter at me fyreåt var etla til det etter hans forset som verkar alt etter sin viljes rådgjerd,

¹²so me skulde vera hans herlegdom til lov, me som fyreåt hadde vona på Kristus.

¹³Og i han hev de og, då de hadde høyrt sannings-ordet, evangeliet um dykkar frelsa - i han hev de og, då de var komne til trui, fenge til innsigle den Heilage Ande, som var oss lova,

¹⁴han som er pantet på vår arv til hans eigedomsfolks utløysing, hans herlegdom til lov.

¹⁵Difor, sidan eg høyrde um dykkar tru på Herren Jesus og um dykkar kjærleik til alle dei heilage,

¹⁶so held eg ikkje upp med å takka for dykk når eg kjem dykk i hug i bønene mine,

¹⁷at vår Herre Jesu Kristi Gud, herlegdomens Fader, må gjeva dykk visdoms og openberrings Ande til kunnskap um seg,

¹⁸og gjeva dykkar hug upplyste augo, so de kann skyna kva von det er han hev kalla dykk til, og kor rik på herlegdom hans arv er ibland dei heilage,

¹⁹og kor yvervættes stor hans makt er for oss som trur, etter verknaden av hans veldige kraft,

²⁰som han synte på Kristus då han vekte han upp frå dei daude og sette han ved si høgre hand i himmelen,

²¹høgt yver all makt og yverråd og alt velde og herredøme og yver kvart namn som vert nemnt, ikkje berre i denne verdi, men og i den komande,

²²og han la alt under hans føter og gav han som hovud yver alle ting åt kyrkja,

²³som er hans lekam, fyllt av han som fyller alt i alle.