Read nynorsk 1938 Paulus' brev til efesarane 3 Bible Online

Paulus' brev til efesarane 3 - nynorsk 1938 bible

Paulus' brev til efesarane 3

¹For den skuld bøygjer eg mine kne, eg, Paulus, Kristi Jesu fange for dykkar skuld, de heidningar -

²um de elles hev høyrt um hushaldet med den Guds nåde som er meg gjeven for dykk,

³at han ved openberring kunngjorde meg løyndomen, so som eg ovanfor hev skrive med få ord.

⁴Når de les det, kann de av det sjå mitt skyn på Kristi løyndom,

⁵som i forne tidebolkar ikkje hev vorte kunngjord for manneborni soleis som han no er openberra for hans heilage apostlar og profetar ved Anden:

⁶at heidningane er medervingar og høyrer med til lekamen og hev lut med i lovnaden i Kristus Jesus ved evangeliet,

⁷det som eg vart tenar for etter den gåva av Guds nåde som eg hev fenge ved verknaden av hans makt.

⁸Meg, den aller ringaste av alle dei heilage, vart denne nåden gjeven å forkynna heidningane evangeliet um Kristi uransakelege rikdom,

⁹og upplysa alle um korleis hushaldet er med den løyndomen som frå ævelege tider hev vore løynd i Gud, som hev skapt alle ting;

¹⁰for Gud vilde at hans mangfaldige visdom no gjenom kyrkja skulde verta kunngjord for maktene og herredømi i himmelen,

¹¹etter det forset frå ævelege tider som han fullførde i Kristus Jesus, vår Herre,

¹²han som me hev fritt mod ved og tilgjenge med tillit ved trui på han.

¹³Difor bed eg at de ikkje må tapa modet ved dei trengslone eg lid for dykk, og som er dykkar æra. -

¹⁴For den skuld bøygjer eg mine kne for Faderen,

¹⁵som er den rette far for alt som heiter barn i himmelen og på jordi,

¹⁶at han etter rikdomen av sin herlegdom må gjeva dykk å verta styrkte med kraft ved hans Ande i dykkar indre menneske,

¹⁷at Kristus må bu ved trui i dykkar hjarto,

¹⁸so de, rotfeste og grunnfeste i kjærleik, må maktast å fata med alle dei heilage kva breidd og lengd og dypt og høgd det er,

¹⁹og kjenna Kristi kjærleik, som gjeng yver all kunnskap, so de kann verta fyllte til all Guds fylla.

²⁰Men honom som kann gjera meir enn alt, ovlangt yver det som me bed um eller skynar, etter den kraft som er verksam i oss,

²¹honom vera æra i kyrkja og i Kristus Jesus gjenom alle ætter i alle ævor! Amen.