Read nynorsk 1938 Paulus' brev til efesarane 6 Bible Online

Paulus' brev til efesarane 6 - nynorsk 1938 bible

Paulus' brev til efesarane 6

¹De born, lyd dykkar foreldre i Herren, for det er rett.

²Æra far din og mor di - dette er det fyrste bodet med lovnad -

³so det må ganga deg vel, og du fær leva lenge i landet.

⁴Og de feder, arga ikkje borni dykkar, men fostra dei upp i Herrens tukt og påminning!

⁵De tenarar, ver lydige mot dykkar herrar etter kjøtet, med age og otte, i dykkar hjartans einfelde, som mot Kristus,

⁶ikkje med augnetenesta, som slike som vil tekkjast menneske, men som Kristi tenarar, so de gjer Guds vilje av hjarta

⁷og godviljugt tener som for Herren og ikkje som for menneske;

⁸for de veit at kva godt kvar gjer, det skal han få att av Herren, anten han so er tenar eller fri mann.

⁹Og de herrar, gjer det same mot dei, so de let vera å truga; for de veit at både deira og dykkar Herre er i himmelen, og han gjer ikkje skil på folk.

¹⁰Elles, vert sterke i Herren og i hans veldes kraft!

¹¹Klæd dykk i Guds fulle herbunad, so de kann standa dykk imot djevelens sløge åtak!

¹²For me hev ikkje strid mot blod og kjøt, men mot herrevelde, mot makter, mot heimsens herrar som råder i myrkret i denne tid, mot vondskaps åndeher i himmelrømdi.

¹³Tak difor Guds fulle herbunad på, so de kann standa imot på den vonde dag og verta standande når de hev vunne yver alt.

¹⁴So statt då umgyrde um dykkar lend med sanning, og klædde i rettferds-brynja,

¹⁵og umbundne på føtene med den tilbunad til strid som evangeliet um freden gjev.

¹⁶Og tak attåt alt dette tru-skjolden, so de med den kann sløkkja alle gloande piler frå den vonde,

¹⁷og tak frelse-hjelmen og Andens sverd, som er Guds ord,

¹⁸medan de alltid bed i Anden med all bøn og påkalling og er årvakne i det med all trott og bøn for alle dei heilage,

¹⁹og for meg med, at det må verta gjeve meg ord når eg opnar min munn, so eg med fritt mod kann kunngjera løyndomen i evangeliet,

²⁰den som eg er sendebod for i lekkjor, at eg må tala med frimod um han, soleis som eg bør tala.

²¹Men so de og kann få vita um mitt tilstand, korleis det gjeng meg, skal Tykikus fortelja dykk alt, han den kjære bror og true tenar i Herren,

²²som eg just difor sender til dykk at de skal få vita korleis det er med oss, og at han kann trøysta hjarto dykkar.

²³Fred vere med brørne, og kjærleik med tru, frå Gud Fader og Herren Jesus Kristus!

²⁴Nåde vere med alle som elskar vår Herre Jesus Kristus med uforgjengeleg kjærleik!