Read nynorsk 1938 Paulus' brev til filipparane 3 Bible Online

Paulus' brev til filipparane 3 - nynorsk 1938 bible

Paulus' brev til filipparane 3

¹Elles, mine brør, gled dykk i Herren! Å skriva det same til dykk er meg ikkje til møda, men dykk til styrkjing.

²Gjev akt på hundane, gjev akt på dei vonde arbeidarane, gjev akt på dei sundskorne!

³For me er dei umskorne, me som tener Gud i hans Ande og rosar oss i Kristus Jesus og ikkje lit på kjøt,

⁴endå eg hev det som eg kunde lita på ogso i kjøt. Um ein annan tykkjer at han kann lita på kjøt, so kann eg det endå meir,

⁵eg som er umskoren den åttande dagen, er av Israels folk, av Benjamins ætt, ein hebrear av hebrearar, i syn på lovi ein farisear,

⁶i ihuga ein forfylgjar av kyrkjelyden, i rettferd etter lovi ulastande.

⁷Men det som var meg ei vinning, det hev eg for Kristi skuld halde for tap.

⁸Ja, eg held og i sanning alt for tap, av di kunnskapen um Kristus Jesus, min Herre, er so mykje meir verd; for hans skuld hev eg tapt det alt saman, og eg held det for skarn, so eg kann vinna Kristus

⁹og verta funnen i han, ikkje med mi rettferd, den som er av lovi, men med den som ein fær ved trui på Kristus, rettferdi av Gud på grunn av trui,

¹⁰so eg må kjenna han og krafti av hans uppstoda og samlaget i hans lidingar, med di eg vert lik med han i hans daude,

¹¹um eg då kann nå fram til uppstoda frå dei daude.

¹²Ikkje so at eg alt hev gripe det eller alt er fullkomen; men eg jagar etter det, um eg kann gripa det, etter som eg og er gripen av Kristus Jesus.

¹³Brør, eg trur ikkje um meg sjølv at eg hev gripe det.

¹⁴Men eitt gjer eg: eg gløymer det som er attanfor, og tøygjer meg etter det som er framanfor, og jagar mot målet, til den sigersprisen som Gud hev kalla oss til der ovan i Kristus Jesus.

¹⁵So mange då som er fullkomne, lat oss hava denne tenkjemåte! og um de i noko tenkjer annarleis, so skal Gud og openberra dykk dette;

¹⁶berre at me, so langt me er komne, held fram i same faret!

¹⁷Vert mine etterfylgjarar, de og, brør, og sjå på dei som ferdast soleis som de hev oss til fyredøme!

¹⁸For det ferdast mange, som eg tidt hev sagt dykk og no endå med tåror segjer er fiendar av Kristi kross,

¹⁹dei som endar med fortaping, som hev buken til sin gud, og som set si æra i si skjemd, dei som trår etter dei jordiske ting.

²⁰For vårt rike er i himmelen, og derifrå ventar me og Herren Jesus Kristus som frelsar,

²¹han som skal umskapa vår nedrings-lekam, so han vert lik hans herlegdoms-lekam, etter hans kraft til å leggja alle ting under seg.