Read nynorsk 1938 Paulus' brev til kolossarane 2 Bible Online

Paulus' brev til kolossarane 2 - nynorsk 1938 bible

Paulus' brev til kolossarane 2

¹For eg vil at de skal vita kor stor strid eg hev for dykk og dei i Laodikea og so mange som ikkje hev set mitt andlet i kjøtet,

²for at hjarta deira må verta trøysta, so dei vert samanknytte i kjærleik og vinn fram til heile rikdomen av det fullvisse skyn, til kunnskap um Guds løyndom, det er Kristus,

³han som alle skattar av visdom og kunnskap finst løynde i.

⁴Dette segjer eg so ingen skal dåra dykk med lokkande tale.

⁵For um eg enn er fråverande i kjøtet, er eg like vel saman med dykk i åndi, og ser med gleda dykkar gode skipnad og den faste grunnen i dykkar tru på Kristus.

⁶Liksom de då fekk Kristus Jesus forkynt som Herre; so ferdast i han,

⁷so at de er rotfeste og vert uppbygde i han og stadfeste i trui, so som de lærde, rike på henne med takksegjing.

⁸Sjå til at det ikkje må vera nokon som gjer dykk til herfang med verdsleg visdom og tom dåring, etter fråsegner av menneske, etter barnelærdomen åt verdi og ikkje etter Kristus.

⁹For i han bur heile guddomsfylla lekamleg,

¹⁰og de er fyllt i han, som er hovudet for all makt og yverråd;

¹¹i han vart de og umskorne med ei umskjering som ikkje er gjord med hender, ved avkleding av kjøtslekamen, ved Kristi umskjering,

¹²då de vart gravlagde med han i dåpen; der vart de og uppreiste med han ved trui på Guds kraft, han som reiste han upp frå dei daude.

¹³Ogso dykk, som var daude ved dykkar misgjerningar og dykkar kjøts fyrehud, gjorde han levande med han, med di han tilgav oss alle våre misgjerningar

¹⁴og strauk ut skuldbrevet mot oss, som var skrive med bodord, det som vitna mot oss, og han rudde det undan med di han nagla det til krossen.

¹⁵Han avvæpna maktene og yverrådene og synte dei openberrleg fram, då han viste seg som sigerherre yver dei på krossen.

¹⁶Lat difor ingen døma dykk for mat eller drykk, eller i spursmål um høgtid eller nymåne eller sabbat!

¹⁷desse ting er berre ein skugge av det som skulde koma, men lekamen høyrer Kristus til.

¹⁸Lat ingen røva sigersprisen frå dykk, um nokon freistar på det med audmykt og engledyrking, med det han fer med syner, vert ovmodig utan grunn av sin kjøtlege hug

¹⁹og ikkje held fast ved hovudet, han som heile lekamen veks Guds vokster ut ifrå, tilhjelpt og samanfest ved sine ledmot og band.

²⁰Hev de døytt med Kristus og soleis vorte frigjorde frå barnelærdomen åt verdi, kvi gjev dei dykk då, som um de skulde leva i verdi, slike bod:

²¹Du skal ikkje taka, ikkje smaka, ikkje røra

²²- det vil segja slikt som alt saman er etla til øyding ved bruk - etter bod og lærdomar av menneske,

²³som vel hev visdom ved sjølvgjord dyrking og audmykt og vyrdløysa mot lekamen, men ikkje ved noko som er æra verdt, berre til mette for kjøtet?