Read nynorsk 1938 Paulus' brev til kolossarane 4 Bible Online

Paulus' brev til kolossarane 4 - nynorsk 1938 bible

Paulus' brev til kolossarane 4

¹De herrar, gjer imot tenarane dykkar som rett og rimeleg er, for de veit at de og hev ein herre i himmelen!

²Ver trottuge i bøni, so de vaker i henne med takksegjing!

³Og bed for oss med, at Gud må opna oss ei dør for ordet so me kann forkynna Kristi løyndom, den som eg og er i lekkjor for,

⁴so eg kann openberra han so som eg bør tala.

⁵Ferdast visleg med dei som er utanfor, so de kjøper den laglege tid!

⁶Lat talen dykkar alltid vera tekkeleg, krydda med salt, so de veit korleis de skal svara kvar og ein.

⁷Korleis det gjeng meg, det skal Tykikus kunngjera dykk alt saman, han min kjære bror og trugne hjelpar og medtenar i Herren,

⁸som eg sender til dykk just for dette, so de skal få vita korleis det er med oss, og so han skal trøysta dykkar hjarto,

⁹saman med Onesimus, den trugne og kjære bror, som er frå dykkar by. Korleis det er her, det skal dei kunngjera dykk alt saman.

¹⁰Aristarkus, min medfange, helsar dykk, og Markus, syskenbarnet åt Barnabas, som de fekk påbod um - når han kjem til dykk, so tak imot han! -

¹¹og Jesus som hev tilnamnet Justus; desse er av dei umskorne dei einaste medarbeidarar for Guds rike som hev vorte meg til hugge.

¹²Epafras helsar dykk, han som er frå dykkar by, ein Kristi Jesu tenar som alltid strider for dykk i sine bøner, at de må standa fullkomne og fullvisse i all Guds vilje;

¹³for eg gjev han det vitnemålet at han hev mykje strev for dykk og dei i Laodikea og dei i Hierapolis.

¹⁴Lukas helsar dykk, den kjære lækjaren, det same gjer Demas.

¹⁵Helsa brørne i Laodikea, og Nymfas og kyrkjelyden i hans hus!

¹⁶Og når dette brevet er lese hjå dykk, so syt for at det og vert lese i kyrkjelyden hjå laodikearane, og at de får lesa brevet frå Laodikea!

¹⁷Og seg til Arkippus: Tak vare på den tenesta som du hev motteke i Herren, so du fullfører henne!

¹⁸Helsing med mi, Paulus', hand: Kom i hug lekkjone mine! Nåden vere med dykk!