Read nynorsk 1938 Josva 18 Bible Online

Josva 18 - nynorsk 1938 bible

Josva 18

¹So kom heile Israels-lyden saman i Silo, og der sette dei upp møtetjeldet; for no var landet vunne og låg for deira fot.

²Men endå var det att sju av Israels-ættene som ikkje hadde skift odelsjordi si.

³Då sa Josva til Israels-borni: Kor lenge vil de drygja fyrr de kjem og eignar til dykk det landet som Herren, Gud åt federne dykkar, hev gjeve dykk?

⁴Kom med tri mann av kvar ætt, som eg kann senda i veg, so skal dei stella seg til og fara kring i landet og skriva upp alt det dei ser, so me kann vita kor mykje der er å skifta; sidan skal dei koma attende til meg.

⁵So skal de byta landet i sju luter og skifta dei millom dykk! Juda-borni skal verta verande i det landet dei hev fenge der sud, og Josefs-ættene i sitt land her nord;

⁶men de skal skriva upp alt som er i landet, i sju bolkar, og koma hit til meg med det de hev skrive, so skal eg kasta lut for dykk her, framfor Herrens, vår Guds, åsyn.

⁷For levitane fær ingen lut millom dykk; Herrens prestedøme er deira arvlut. Og Gad og Ruben og den eine helvti av Manasse-ætti hev fenge sitt land austanfor Jordan, det landet som Moses, Herrens tenar, gav dei.

⁸So gjorde mennene seg reiduge og for, og då dei tok ut, sa Josva til dei at dei skulde skriva upp alt dei såg i landet; han sa: Tak i vegen og far kring i landet og skriv upp alt de ser der, og kom so attende til meg! So skal eg kasta lut for dykk framfor Herrens åsyn her i Silo.

⁹Dermed tok mennene av stad og for kring i landet og skreiv upp by for by i ei bok i sju bolkar. So kom dei attende til Josva, til Silolægret,

¹⁰og Josva kasta lut for dei framfor Herrens åsyn; der, i Silo, skifte han landet millom Israels-borni etter folkegreinene deira.

¹¹Den fyrste luten fall på Benjamins-borni og ættgreinene deira; det landet dei fekk, kom til å liggja millom Juda-borni og Josefs-borni.

¹²Fylkesdeilet gjekk på nordsida ut frå Jordan og uppetter til åsen nordanfor Jeriko og stemnde so vestetter upp i fjellet og fram til øydemarki ved Bet-Aven.

¹³Derifrå tok det burtyver til Luz, til åsen sunnanfor Luz, der Betel ligg, og gjekk so ned til Atrot-Addar yver det fjellet som ligg sunnanfor Nedre Bet-Horon.

¹⁴So gjorde skiftelina ein sving og vende seg på vestsida sudetter frå det fjellet som ligg beint sunnanfor Bet-Horon, til ho enda innmed Kirjat-Ba'al, ein by som høyrde Juda-borni til; no heiter han Kirjat-Jearim. Dette var vestsida.

¹⁵På sudsida gjekk fylkesdeilet frå enden av Kirjat-Jearim - der var det skiftelina tok til i vest - og fram til Neftoahvasskjelda.

¹⁶So gjekk skiftelina ned til foten av fjellet som ligg midt for Hinnomssonsdalen, nordanfor Refa'imdalen, tok so ned i Hinnomsdalen, på sudsida av Jebusitaråsen, og ned til En-Rogel.

¹⁷Sidan svinga ho mot nord og gjekk fram til En-Semes og til Gelilot, som ligg midt for Adummimkleivi, og tok so ned til den steinen som heiter etter Bohan Rubensson.

¹⁸Der tok ho yver til den åsen som ligg rett nord for Ha'araba, og so ned til Ha'araba.

¹⁹Sidan heldt ho fram til nordsida av Bet-Hoglaåsen og enda i den nørdste viki av Saltsjøen, attmed Jordanosen. Dette var fylkesdeilet i sud.

²⁰På austsida var det Jordan som var deile. Dette var odelsjordi åt Benjamins-borni og ættgreinene deira, med fylkesdeildene rundt ikring.

²¹Byane som Benjamins-ætti og greinene hennar fekk, var: Jeriko og Bet-Hogla og Emek-Kesis

²²og Bet-Ha'araba og Semara'im og Betel

²³og Ha'avvim og Happara og Ofra,

²⁴og Kefar-Ha'ammoni og Haofni og Geba, tolv byar med grendene ikring;

²⁵Gibeon og Rama og Be'erot

²⁶og Mispe og Hakkefira og Hammosa

²⁷og Rekem og Jirpe'el og Tarala

²⁸og Sela, Haelef og Jebus, som no heiter Jerusalem, og Gibat og Kirjat - fjortan byar med grendene ikring. Dette var landet åt Benjamins-borni og ættgreinene deira.