Read nynorsk 1938 Josva 6 Bible Online

Josva 6 - nynorsk 1938 bible

Josva 6

¹I Jeriko læste dei portane og stengde seg inne for Israels-borni skuld; ingen gjekk ut, og ingen kom inn.

²Då sa Herren til Josva: Sjå, no gjev eg Jeriko i dine hender, med kongen og dei djerve stridsmennene hans!

³Lat alt herfolket ganga rundt ikring byen EIN gong um dagen; so skal du gjera i seks dagar;

⁴og sju prestar skal bera sju stridslurar framfyre paktkista. Men den sjuande dagen skal de ganga sju gonger kring byen, og prestane skal blåsa i lurane.

⁵Og når stridshornet tek til å ljoma med lange tonar, og de høyrer lurljoden, skal heile heren setja i og ropa so sterkt dei kann; då skal muren ramla ned, so folket kann stiga yver han, beint inn i byen.

⁶Då kalla Josva Nunsson prestane til seg og sa til dei: No skal de taka paktkista og bera henne, og sju prestar skal bera sju stridslurar framfyre Herrens kista.

⁷Og til folket sa han: Tak no i veg og gakk kringum byen! Dei herbudde skal ganga framfyre Herrens kista!

⁸Då Josva hadde sagt dette til folket, gjekk dei i vegen dei sju prestane som bar dei sju stridslurane for Herrens åsyn; dei bles i lurane, og Herrens paktkista fylgde etter dei.

⁹Dei herbudde gjekk fyre prestane som bles i lurane, og dei som var attarst i ferdi, gjekk etter paktkista, og lurane ljoma i eino.

¹⁰Men Josva sa til folket: De må ikkje ropa og ikkje lata upp målet! Ikkje eit ord må koma frå munnen dykkar fyrr den dagen eg segjer til dykk: Ropa no! Då skal de ropa.

¹¹So for Herrens kista heilt ikring byen ein gong; sidan drog dei inn i lægret og var der um natti.

¹²Morgonen etter var Josva tidleg uppe, og prestane tok og bar Herrens kista.

¹³Og dei sju prestane bar dei sju stridslurane framfyre Herrens kista og bles alt i eitt i lurane. Dei herbudde gjekk fyre dei, og dei som attarst var, gjekk etter Herrens kista, medan lurane ljoma i eino.

¹⁴Soleis for dei den andre dagen EIN gong kring byen og gjekk so attende til lægret. So gjorde dei i seks dagar.

¹⁵Den sjuande dagen reis dei upp med same det tok til å dagast, og gjekk sju gonger kring byen; dei for like eins åt som fyrr, berre at dei den dagen gjekk sju gonger kring byen.

¹⁶Då no prestane bles i lurane den sjuande gongen, då sa Josva til folket: Ropa no! For Herren hev gjeve dykk byen.

¹⁷Og byen med alt det som i han er, skal vera vigd til Herren og bannstøytt. Berre Rahab, skjøkja, og alle som er i huset hjå henne, skal få leva, for di ho løynde dei mennene me sende ut.

¹⁸Akta no de dykk berre for det som er vigt, so de ikkje fyrst vigjer og sidan tek av det vigde, og soleis legg Israelslægret under bann og fører det i ulukka.

¹⁹Men alt sylvet og gullet og alle ting som er av kopar eller jarn, skal helgast til Herren og koma i Herrens skattkammer.

²⁰So tok folket til å ropa, og dei bles i lurane; og då folket høyrde lurljoden, sette dei i med eit øgjeleg herskrik; då ramla muren ned, og folket steig beint inn i byen; og då dei hadde teke han,

²¹bannstøytte dei alt som fanst der; både menner og kvinnor, både unge og gamle, både storfe og småfe og asen hogg dei ned.

²²Men Josva sa til dei tvo mennene som hadde njosna der i landet: Gakk inn i huset åt skjøkja og få med dykk ut både kvinna sjølv og alt folket hennar, soleis som de hev lova henne!

²³So gjekk dei inn, dei unge mennene som hadde vore der og njosna, og dei henta Rahab og foreldri og brørne hennar og alle andre som høyrde til ætti; alt skyldfolket hennar henta dei ut og fann ein verestad åt dei utanfor Israelslægret.

²⁴Byen brende dei upp med alt som i han var; men sylvet og gullet og alle ting som var av kopar eller jarn, la dei ned i skattkammeret i Herrens hus.

²⁵Josva let Rahab, skjøkja, få leva, og heile huslyden og alt skyldfolket hennar, og sidan hev ho og ætti hennar fenge bu millom Israels-folket alt til denne dag, for di ho løynde dei mennene som Josva hadde sendt av stad til å njosna i Jeriko.

²⁶Den gongen let Josva folket sverja denne eiden: Forbanna for Herrens åsyn vere den mannen som tek seg til å byggja upp att denne byen Jeriko! Når han legg grunnvollen, skal det kosta han eldste sonen, og når han set upp portane, skal han missa den yngste.

²⁷Soleis var Herren med Josva, og det gjekk gjetord um han yver heile landet.