Read nynorsk 1938 Paulus' andre brev til tessalonikarane 2 Bible Online

Paulus' andre brev til tessalonikarane 2 - nynorsk 1938 bible

Paulus' andre brev til tessalonikarane 2

¹Me bed dykk, brør, vedkomande vår Herre Jesu Kristi tilkoma og vår sameining med han,

²at de ikkje so snart må lata dykk villa burt frå vitet eller skræma, korkje ved nokor ånd eller ved nokor tale eller av noko brev, liksom det skulde vera frå oss, som um Herrens dag alt stod for døri.

³Lat ingen dåra dykk på nokon måte! for fyrst lyt fråfallet koma, og syndmennesket verta openberra, fortapingssonen,

⁴han som set seg imot og upphøgjer seg yver alt som heiter gud eller heilagdom, so han set seg i Guds tempel og gjev seg sjølv ut for å vera Gud.

⁵Minnest de ikkje at eg sa dykk dette medan eg endå var hjå dykk?

⁶Og no veit de kva som held att, so han fyrst skal verta openberra i si tid.

⁷For løyndomen i lovløysa er alt verksam, berre at den som no held att, vert rudd undan;

⁸og då skal den lovlause verta openberra, han som Herren Jesus skal tyna med sin munns ande og gjera til inkjes ved openberringi av si tilkoma.

⁹Og hans tilkoma gjeng fyre seg, etter Satans kraftige verknad, med all kraft og teikn og under av lygni,

¹⁰og med all dåring av urettferdi for dei som vert fortapte, av di dei ikkje tok imot kjærleik til sanningi, so dei kunde verta frelste.

¹¹Og difor sender Gud dei kraftig villfaring, so dei trur lygni,

¹²so alle dei skal verta dømde som ikkje hev trutt sanningi, men havt hugnad i urettferdi.

¹³Men me skyldar å takka Gud alltid for dykk, brør, de som er elska av Herren, for di Gud frå upphavet valde dykk ut til frelsa, ved helging av Anden og tru på sanningi,

¹⁴som han kalla dykk til ved vårt evangelium, so de skal vinna vår Herre Jesu Kristi herlegdom.

¹⁵Difor, brør, stat traust og hald fast ved dei lærdomar som de hev lært anten ved vår tale eller i brev frå oss!

¹⁶Og han vår Herre Jesus Kristus og Gud vår Fader, som elska oss og gav oss ei æveleg trøyst og ei god von i nåde,

¹⁷han trøyste dykkar hjarto og styrke dykk i all god gjerning og tale!