Read nynorsk 1938 Paulus' andre brev til tessalonikarane 3 Bible Online

Paulus' andre brev til tessalonikarane 3 - nynorsk 1938 bible

Paulus' andre brev til tessalonikarane 3

¹Elles, brør, bed for oss at Herrens ord må hava framgang og koma til æra liksom hjå dykk,

²og at me må verta utfria frå dei ulikelege og vonde menneske; for trui er ikkje kvar manns sak.

³Men Herren er trufast; han skal styrkja dykk og vara dykk frå det vonde.

⁴Me hev den tiltru til dykk i Herren at de både gjer og kjem til å gjera det som me byd dykk.

⁵Og Herren styre dykkar hjarto til å elska Gud og til å venta på Kristus med tolmod!

⁶Men me byd dykk, brør, i vår Herre Jesu Kristi namn at de held dykk burte frå kvar ein bror som ferdast uskipeleg og ikkje etter den lærdomen som dei fekk av oss.

⁷For de veit sjølve korleis de skal etterfylgja oss; for me levde ikkje uskipeleg millom dykk;

⁸me åt ikkje heller brød hjå nokon for inkje, men i strev og møda arbeidde me natt og dag; so me ikkje skulde vera nokon av dykk til tyngsla;

⁹ikkje for at me ikkje hev rett til det, men at me kunde gjeva dykk eit fyredøme i oss sjølve, so de skulde etterfylgja oss;

¹⁰for då me var hjå dykk, baud me dykk og det at um nokon ikkje vil arbeida, skal han heller ikkje eta.

¹¹For me høyrer at sume millom dykk ferdast uskipeleg og ikkje arbeider, men fer med slikt som ikkje kjem dei ved.

¹²Men slike byd og påminner me i Herren Jesus Kristus at dei skal arbeida i stilla og eta sitt eige brød.

¹³Men de, brør, vert ikkje trøytte av å gjera det som rett er!

¹⁴Men um nokon ikkje lyder vårt ord her i brevet, so merk dykk han, so han må blygjast,

¹⁵og haldt han ikkje for ein fiende, men påminn han som ein bror.

¹⁶Men han, fredens Herre, gjeve dykk fred alltid, i alle måtar. Herren vere med dykk alle!

¹⁷Helsing med mi, Paulus' hand; dette er eit merke i kvart brev; soleis skriv eg:

¹⁸Vår Herre Jesu Kristi nåde vere med dykk alle!