Read nynorsk 1938 Paulus' fyrste brev til Timoteus 2 Bible Online

Paulus' fyrste brev til Timoteus 2 - nynorsk 1938 bible

Paulus' fyrste brev til Timoteus 2

¹So påminner eg då framfor alle ting um at det vert gjort bøner, påkallingar, forbøner, takksegjingar for alle menneske,

²for kongar og alle dei som er i yverrådande stand, so me kann leva eit stilt og roleg liv i gudlegdom og søma.

³For dette er godt og tekkeleg for Gud, vår frelsar,

⁴han som vil at alle menneske skal verta frelste og koma til å kjenna sanningi.

⁵For det er EIN Gud og EIN millommann millom Gud og menneske, mennesket Kristus Jesus,

⁶han som gav seg sjølv til løysepening for alle, eit vitnemål i si tid;

⁷og for dette vart eg sett til forkynnar og apostel - eg segjer sanning, eg lyg ikkje - ein lærar for heidningane i tru og sanning.

⁸Eg vil då at mennene på kvar stad skal beda so at dei lyfter heilage hender, utan vreide og tretta;

⁹like eins og at kvinnone skal pryda seg med sømeleg klædnad, i blygd og æra, ikkje med flettingar og gull eller perlor eller dyr klædebunad,

¹⁰men som det sømer seg kvinnor som vedkjenner seg gudlegdom, med gode gjerningar.

¹¹Ei kvinna skal lata seg læra i stilla, med all lydnad;

¹²men eg gjev ikkje ei kvinna lov til å vera lærar eller å bjoda yver mannen, ho skal vera i stilla.

¹³For Adam vart skapt fyrst, og so Eva;

¹⁴og Adam vart ikkje dåra, men kvinna vart dåra og fall i misgjerning.

¹⁵Men ho skal verta frelst gjenom si barneign, um dei vert standande i tru og kjærleik og helging med søma.