Read nynorsk 1938 Paulus' brev til Titus 1 Bible Online

Paulus' brev til Titus 1 - nynorsk 1938 bible

Paulus' brev til Titus 1

¹Paulus, Guds tenar og Jesu Kristi apostel til å føra Guds utvalde til tru og til å kjenna den sanning som høyrer til gudlegdom,

²i von um æveleg liv, som Gud, han som ikkje lyg, hev lova frå ævelege tider,

³men no i si tid hev han openberra sitt ord i den forkynning som vart meg yvergjevi etter Guds, vår frelsars fyresegn

⁴- til Titus, min ektefødde son i den sams trui: Nåde og fred frå Gud Fader og Kristus Jesus, vår frelsar!

⁵For den skuld let eg deg etter på Kreta at du skulde skipa til det som vanta, og setja inn eldste i kvar by, so som eg sa deg fyre,

⁶um det er nokon som er ulastande, mann til EI kvinna, og hev truande born som ikkje hev vondt ord for skamløysa eller er ulydige.

⁷For ein tilsynsmann skal vera ulastande som ein Guds hushaldar, ikkje sjølvgod, ikkje vondlyndt, ikkje drikkekjær, ikkje hardhendt, ikkje lysten etter låk vinning,

⁸men gjestmild, glad i det gode, visleg, rettferdig, heilag, fråhalden,

⁹ein som held seg til det truverdige ordet etter læra, so han kann vera før både til å påminna med den heilsame læra og til å tala dei til rettes som segjer imot.

¹⁰For det er mange agelause, som fer med tomt svall og dårar hugen på folk, mest dei av umskjeringi.

¹¹Desse skal ein målbinda; for dei riv ned heile hus med di dei lærer slikt som ikkje sømer seg, for låk vinning skuld.

¹²Ein av dei, deira eigen profet, hev sagt: Kretarar er alltid ljugarar, vonde dyr, late bukar.

¹³Dette vitnemålet er sant. Difor skal du refsa dei strengt, so dei må verta heile i trui

¹⁴og ikkje ansa jødiske eventyr og bod av menneske som vender seg frå sanningi.

¹⁵Alt er reint for dei reine; men for dei ureine og vantruande er ingen ting rein; både hugen deira og samvitet deira er ureine.

¹⁶Dei segjer at dei kjenner Gud; men med gjerningane sine forneittar dei han, for dei er styggelege og ulydige og duglause til all god gjerning.