Read nynorsk 1938 Brevet til hebrearane 13 Bible Online

Brevet til hebrearane 13 - nynorsk 1938 bible

Brevet til hebrearane 13

¹Lat broderkjærleiken vara ved!

²Gløym ikkje gjestmildskapen! for ved den hev nokre havt englar til gjester utan dei visste det.

³Kom i hug dei som er fangar, som um de var deira medfangar, dei som lid vondt, sidan de og sjølve er i lekamen!

⁴Ekteskapet vere i akt og æra hjå alle, og ektesengi usmitta! for lauslevande og horkarar skal Gud døma.

⁵Lat dykkar ferd vera utan pengehug, so de er nøgde med det de hev! for han hev sagt: Eg skal so visst ikkje sleppa deg og ikkje forlata deg,

⁶so me hugheilt kann segja: Herren er min hjelpar, eg vil ikkje ottast; kva kann eit menneske gjera meg?

⁷Kom i hug førarane dykkar, som hev tala Guds ord til dykk! gjev akt på utgangen av deira ferd, og fylg so etter deira tru!

⁸Jesus Kristus er i går og i dag den same, ja til æveleg tid.

⁹Lat dykk ikkje føra vilt av mangfaldige og framande lærdomar! for det er godt at hjarta vert styrkt ved nåden, ikkje ved mat, som ikkje hev gagna dei som for med slikt.

¹⁰Me hev eit altar som dei ikkje hev lov til å eta av, dei som tener ved tjeldet;

¹¹for dei dyr som blodet vert teke av og bore inn i heilagdomen ved øvstepresten til soning for synd, deira kroppar vert uppbrende utanfor lægret;

¹²difor leid og Jesus utanfor porten, so han ved sitt eige blod kunde helga folket.

¹³Lat oss då ganga ut til han utanfor lægret og bera hans vanæra!

¹⁴For me hev ikkje her ein varande by, men søkjer den komande.

¹⁵Lat oss då ved han alltid bera fram til Gud lovoffer, det er: frukt av lippor som lovar hans namn!

¹⁶Men gløym ikkje å gjera godt og gjeva andre med dykk! for slike offer hev Gud hugnad i.

¹⁷Fylg dykkar førarar og lyd dei! for dei vaker yver sjelene dykkar som dei som skal gjera rekneskap, so dei kann gjera det med gleda og ikkje sukkande; for det er dykk ikkje til gagn.

¹⁸Bed for oss! for me er visse på at me hev eit godt samvit, og me vil gjerne fara rett åt i alle måtar.

¹⁹Og eg bed dykk so mykje meir um å gjera dette, so eg snarare kann verta gjeven dykk att.

²⁰Men fredens Gud, han som i kraft av ei æveleg pakts blod førde den store hyrdingen for sauene, vår Herre Jesus, upp frå dei daude,

²¹han gjere dykk full-dugande i all god gjerning, so de kann gjera hans vilje, med di han verkar i dykk det som er til hugnad for han, ved Jesus Kristus! Honom vere æra i all æva! Amen.

²²Eg bed dykk, brør, tak dette påminningsordet vel upp; for eg hev skrive stutt til dykk.

²³Vit at bror vår Timoteus er gjeven fri; saman med han vil eg vitja dykk, um han kjem snart.

²⁴Helsa alle dykkar førarar og alle dei heilage! Dei frå Italia helsar dykk.

²⁵Nåden vere med dykk alle!