Read nynorsk 1938 Brevet til hebrearane 2 Bible Online

Brevet til hebrearane 2 - nynorsk 1938 bible

Brevet til hebrearane 2

¹Difor lyt me so mykje meir akta på det me hev høyrt, so me ikkje skal driva burt ifrå det.

²For dersom det ordet som var tala ved englar, stod fast, og kvar misgjerd og ulydnad fekk si rettferdige løn,

³kor skal då me sleppa undan um me ikkje vyrder so stor ei frelsa? - den som fyrst vart forkynt ved Herren og sidan stadfest for oss av dei som hadde høyrt han,

⁴med di Gud vitna med, både ved teikn og under og ymse kraftige verk og tildeling av den Heilage Ande etter sin vilje.

⁵For det var ikkje under englar han la den komande verdi, som me talar um.

⁶Men ein hev vitna ein stad og sagt: Kva er eit menneske, at du kjem han i hug, eller ein menneskeson, at du ser til han?

⁷Du gjorde han lite lægre enn englane; med herlegdom og æra krynte du han, og sette han yver dei verk dine hender gjorde;

⁸alle ting la du under hans føter. For då han la alle ting under han, so tok han ingen ting undan som ikkje er han underlagd; men no ser me endå ikkje at alle ting er han underlagde;

⁹men den som var gjord lite lægre enn englane, Jesus, han ser me, av di han leid dauden, krynt med herlegdom og æra, so han ved Guds nåde skulde smaka dauden for alle.

¹⁰For det sømde seg han som alt er til for, og som alt er til ved, då han førde mange born til herlegdom, å fullenda frelse-hovdingen deira gjenom lidingar.

¹¹For både den som helgar, og dei som vert helga, er alle av ein; difor skjemmest han ikkje ved å kalla dei brør,

¹²når han segjer: Eg vil kunngjera ditt namn for mine brør, midt i lyden vil eg lovsyngja deg.

¹³Og atter: Eg vil setja mi lit til han. Og atter: Sjå, her er eg og dei born Gud hev gjeve meg.

¹⁴Etter di no borni hev lut i blod og kjøt, so fekk han og like eins lut i det, so han ved dauden kunne gjera den til inkjes som hadde daudens velde, det er djevelen,

¹⁵og fria ut alle dei som av redsla for dauden var i trældom all si livstid.

¹⁶For englar han tek seg ikkje av, men Abrahams ætt tek han seg av;

¹⁷difor laut han verta brørne sine lik i alle ting, so han kunde verta ein miskunnsam og trufast øvsteprest for Gud til å gjera soning for syndene åt folket.

¹⁸For av di han sjølv hev lide og vorte freista, so kann han koma dei til hjelp som vert freista.