Read nynorsk 1938 Brevet til hebrearane 4 Bible Online

Brevet til hebrearane 4 - nynorsk 1938 bible

Brevet til hebrearane 4

¹Lat oss difor taka oss i vare for at nokon av dykk skal synast å verta standande etter, sidan ein lovnad um å koma inn til hans kvila endå stend att.

²For fagnadbodet er og forkynt oss, liksom for hine; men ordet dei høyrde, gagna ikkje dei, av di det ikkje ved trui var sameina med dei som høyrde det.

³For me som er komne til trui, me gjeng inn til kvila, etter det som han hev sagt: So svor eg i min vreide: Sanneleg, dei skal ikkje koma inn til mi kvila - endå gjerningane var fullførde alt sidan verdi var grunnlagd.

⁴For han hev ein stad sagt so um den sjuande dagen: Og Gud kvilde den sjuande dagen alle sine gjerningar;

⁵og atter på denne staden: Sanneleg, dei skal ikkje koma inn til mi kvila.

⁶Etter di det soleis sendt att nokre skal koma inn til henne, og dei som fyrst fekk fagnadbodet, ikkje kom inn for vantru skuld,

⁷so set han atter ein dag: i dag, med di han lenge segjer ved David so lang tid etter, som fyrr er sagt: I dag, um de høyrer hans røyst, so forherd ikkje hjarto dykkar!

⁸For dersom Josva hadde ført dei til kvila, so hadde han ikkje deretter tala um ein annan dag.

⁹So stend det då att ei sabbatshelg for Guds folk.

¹⁰For den som er komen inn til hans kvila, han hev og fenge kvila frå sine gjerningar, liksom Gud sine.

¹¹Lat oss difor leggja vinn på å koma inn til den kvila, so ikkje nokon skal falla etter det same fyredøme på vantru.

¹²For Guds ord er levande og kraftig og kvassare enn noko tvieggja sverd, og trengjer seg igjenom, til dess det kløyver sjel og ånd, ledmot og merg, og dømer hjartans tankar og råder,

¹³og ingen skapning er løynd for hans åsyn, men alt er nake og bert for hans augo som me hev å gjera med.

¹⁴Sidan me no hev ein stor øvsteprest, som hev gjenge gjenom himlane, Jesus, Guds Son, so lat oss halda fast på vedkjenningi!

¹⁵For me hev ikkje ein øvsteprest som ikkje kann hava medynk med vår vesaldom, men ein som er røynd i alle ting i likning med oss, då utan synd.

¹⁶Lat oss difor med frimod ganga fram for nådens kongsstol, so me kann få miskunn og finna nåde til hjelp i rette tid!