Read nynorsk 1938 Brevet til hebrearane 6 Bible Online

Brevet til hebrearane 6 - nynorsk 1938 bible

Brevet til hebrearane 6

¹Lat oss difor ganga framum barnelærdomen um Kristus og skrida fram mot det fullkomne, og ikkje atter leggja grunnvollen med umvending frå daude gjerningar og tru på Gud,

²med læra um dåp og handpåleggjing og uppstoda av daude og æveleg dom.

³Og dette vil me gjera, um Gud gjev lov til det.

⁴For det er umogeleg at dei som ein gong er upplyste og hev smaka den himmelske gåva og fenge lut i den Heilage Ande

⁵og hev smaka Guds gode ord og kraftene av den komande verdi, og so fell frå, atter kann uppnyast til umvending,

⁶sidan dei på nytt krossfester Guds Son for seg og gjer han til spott.

⁷For den jordi som drikk regnet som ofte fell på henne, og ber den gagnlege grøda åt dei som ho vert dyrka for, ho fær velsigning av Gud;

⁸men ber ho tornar og tistlar, so er ho udugleg og forbanning nær, og enden med henne er å verta brend.

⁹Men um dykk, de kjære, er me visse på det som betre er, og som høyrer til frelsa, endå me talar soleis.

¹⁰For Gud er ikkje urettferdig, so han skulde gløyma dykkar verk og den kjærleiken som de hev synt for hans namn, med di de hev tent og endå tener dei heilage.

¹¹Men me ynskjer at kvar ein av dykk må syna den same ihugen for den fulle vissa i voni alt til enden,

¹²so de ikkje skal verta seinføre, men fylgja etter dei som ved tru og tolmod erver det som var lova.

¹³For då Gud gav Abraham lovnaden, svor han ved seg sjølv, sidan han ingen større hadde å sverja ved, og sa:

¹⁴Sanneleg, eg vil rikleg velsigna deg og gjera storleg mangfaldig.

¹⁵Og soleis vann han det som var lova, då han hadde venta med tolmod.

¹⁶For menneske sver ved ein større, og eiden er dei ein ende på all motsegn, til stadfesting.

¹⁷Difor gjekk Gud imillom med ein eid, då han enn meir vilde syna ervingane til lovnaden kor ubrigdeleg hans vilje var,

¹⁸so me ved tvo ubrigdelege ting, som Gud umogeleg kunde svika i, skulde hava ei sterk trøyst, me som flydde til å gripa den voni som ventar oss,

¹⁹den me hev som eit anker for sjeli, eit som er trygt og fast og når inn um forhenget,

²⁰der Jesus gjekk inn fyregangsmann for oss, med di han vart øvsteprest etter Melkisedeks vis til æveleg tid.