Read nynorsk 1938 Jakobs brev 2 Bible Online

Jakobs brev 2 - nynorsk 1938 bible

Jakobs brev 2

¹Mine brør, lat ikkje dykkar tru på vår Herre Jesus Kristus, den herleggjorde, hava det med seg at de gjer skil på folk!

²For um det kjem ein mann inn i samlingi dykkar med gullring på fingeren og i skinande klæde, men det og kjem ein fatigmann i skitne klæde,

³og de ser på han som hev den skinande klædnaden, og segjer: Set du deg her i god sess! og de segjer til den fatige: Statt de der, eller set deg nedfor fotskammelen min! -

⁴gjer de ikkje då skilnad hjå dykk sjølve og hev vorte domarar med vonde tankar?

⁵Høyr no, mine kjære brør: Hev ikkje Gud valt ut dei som er fatige på verdsens gods, til å vera rike i trui og ervingar til det riket han hev lova dei som elskar han?

⁶Men de hev vanæra den fatige. Er det ikkje dei rike som trælkar dykk, og som dreg dykk fram for domstolane?

⁷Er det ikkje dei som spottar det gode namnet som de er nemnde med?

⁸I sanning, um de uppfyller den kongelege lov etter Skrifti: Du skal elska næsten din som deg sjølv, so gjer de vel;

⁹Men gjer de skil på folk, so gjer de synd, og lovi refser dykk som lovbrjotarar.

¹⁰For den som held heile lovi, men snåvar i ein ting, han hev brote saka i alt.

¹¹For han som sa: Du skal ikkje gjera hor, han sa og: Du skal ikkje slå i hel. Um du då ikkje gjer hor, men slær i hel, so hev du vorte ein lovbrjotar.

¹²Tala so og gjer so som dei som skal verta dømde etter fridoms lov!

¹³For domen skal vera miskunnlaus yver den som ikkje hev gjort miskunn; men miskunn rosar seg mot domen.

¹⁴Kva gagnar det, mine brør, um nokon segjer at han hev tru, når han ikkje hev gjerningar? Kann vel trui frelsa han?

¹⁵Um ein bror eller ei syster er nakne og vantar føda for dagen,

¹⁶og ein av dykk segjer til dei: Gakk i fred, verm dykk og et dykk mette! men de ikkje gjev dei det som lekamen treng, kva gagnar so det?

¹⁷Soleis og med trui: hev ho ikkje gjerningar, so er ho daud i seg sjølv.

¹⁸Men ein kann segja: Du hev tru, og eg hev gjerningar. Syn meg di tru utan gjerningar, so skal eg syna deg mi tru av mine gjerningar.

¹⁹Du trur at Gud er EIN; du gjer rett; djevlane trur og det og skjelv.

²⁰Og vil du vita det, du dårlege menneske, at trui er nyttelaus utan gjerningar?

²¹Abraham, ættefaren vår, vart ikkje han rettferdiggjord ved gjerningar, då han ofra Isak, son sin, på altaret?

²²Du ser at trui verka saman med gjerningane hans, og at trui vart fullkomi ved gjerningane,

²³og Skrifti vart uppfyllt, som segjer: Abraham trudde Gud, og det vart rekna han til rettferd, og han vart kalla Guds ven.

²⁴De ser at eit menneske vert rettferdiggjort ved gjerningar, og ikkje ved tru åleine.

²⁵Like eins og med Rahab, skjøkja: vart ho ikkje rettferdiggjord ved gjerningar, då ho tok imot sendemennene og slepte dei ut ein annan veg?

²⁶For liksom lekamen er daud utan ånd, so er og trui daud utan gjerningar.