Read nynorsk 1938 Jakobs brev 3 Bible Online

Jakobs brev 3 - nynorsk 1938 bible

Jakobs brev 3

¹Mine brør, ikkje mange av dykk verte lærarar etter di de veit at me skal få dess tyngre dom!

²For alle snåvar me i mangt. Den som ikkje snåvar i tale, han er ein fullkomen mann, som er før til å tøyma heile lekamen og.

³Når me legg beisl i munnen på hestane, so dei skal lystra oss, so styrer me og heile lekamen deira.

⁴Ja, endå skipi, som er so store og vert drivne av sterke vindar, vert styrde med ein liten ror dit som styrmannen vil hava dei.

⁵So er og er tunga ein liten lem, og talar endå store ord. Sjå ein liten eld, kor stor ein skog han set i brand!

⁶Tunga er og ein eld; ei verd full av urettferd, soleis stend tunga millom lemene våre; ho smittar heile lekamen og set livsens hjul i loge, og vert sjølv sett i loge av helvete.

⁷For all natur, både i dyr og fuglar, både i ormar og sjødyr, vert tamd og hev vorte tamd av den menneskjelege naturi;

⁸men tunga kann inkje menneske temja; ho er ein ustyrleg vond ting, full av døyande eiter.

⁹Med henne velsignar me Herren og Faderen, og med henne bannar me menneski, som er skapte etter Guds bilete.

¹⁰Or same munnen kjem det velsigning og banning. Dette må ikkje vera so, mine brør!

¹¹Gjev vel kjelda søtt og beiskt vatn ut or same uppkoma?

¹²Mine brør, kann då eit fiketre bera oljebær, eller eit vintre fikor? Heller ikkje kann ei salt kjelde gjeva søtt vatn.

¹³Kven er vis og vitug imillom dykk? Han må ved god ferd syna sine gjerningar i visdoms spaklynde.

¹⁴Men hev de beisk ovund og stridssykja i hjarto dykkar, so rosa dykk ikkje imot sanningi og ljug ikkje imot henne!

¹⁵Den visdomen kjem ikkje ovantil, men er jordisk, reint sanseleg, djevelsk.

¹⁶For der det er ovund og stridssykja, der er ugreida og alt det som vondt er.

¹⁷Men visdomen ovantil, han er fyrst og fremst rein, og dinæst fredsam, rimeleg, ettergjevande, full av miskunn og gode frukter, fri for tvil og fri for skrymt.

¹⁸Men rettferds frukt vert sådd i fred for dei som held fred.