Read nynorsk 1938 Jakobs brev 4 Bible Online

Jakobs brev 4 - nynorsk 1938 bible

Jakobs brev 4

¹Kvar kjem all ufreden ifrå, og kvar kjem all striden ifrå millom dykk? Er det ikkje av lystene dykkar, som strider i lemene dykkar?

²De lyster, og hev ikkje; de slær i hel og ovundast, og kann ikkje få; de ligg i strid og ufred. De hev ikkje, av di de ikkje bed;

³de bed og fær ikkje, av di de bed ille, so de kann øyda det upp i lystene dykkar.

⁴De utrugne! veit de ikkje at venskap med verdi er fiendskap mot Gud? Den som då vil vera ven med verdi, han vert Guds fiende.

⁵Eller trur de at Skrifti talar fåfengt? Med brennhug trår han etter den åndi som han hev late bu i oss, men di større er den nåden som han gjev.

⁶Difor heiter det: Gud stend dei stolte imot, men dei audmjuke gjev han nåde.

⁷Ver difor Gud undergjevne! Men statt djevelen imot, so skal han fly frå dykk!

⁸Haldt dykk nær til Gud, so skal han halda seg nær til dykk! Två hendene, de syndarar, og reinsa hjarto, de tvihuga!

⁹Kjenn dykkar naud og syrg og gråt! Lat låtten dykkar vendast til sorg, og gleda til trege!

¹⁰Audmyk dykk for Herren, so han skal upphøgja dykk!

¹¹Baktala ikkje kvarandre, brør! Den som baktalar ein bror eller dømer bror sin, han baktalar lovi og dømer lovi; men dømer du lovi, so er du ikkje ein som gjer etter lovi, men hennar domar.

¹²EIN er lovgjevaren og domaren, han som er mektig til å frelsa og til å tyna. Men du, kven er du som dømer næsten din?

¹³Og no, de som segjer: I dag eller i morgon vil me fara til den byen og vera der eit år og handla og hava vinning,

¹⁴de som ikkje veit kva som skal henda i morgon! For kva er livet dykkar? De er ein eim som er synleg ei liti stund og so kverv burt.

¹⁵I staden for at de skulde segja: Um Herren vil, so kjem me til å leva, og so skal me gjera det eller det.

¹⁶Men no rosar de dykk sjølve i dykkar storlæte. All slik ros er vond.

¹⁷Den som då veit å gjera godt, men ikkje gjer det, han hev synd for det.