Read nynorsk 1938 Jakobs brev 5 Bible Online

Jakobs brev 5 - nynorsk 1938 bible

Jakobs brev 5

¹Og no, de rike, gråt og barma dykk for dei ulukkone som skal koma yver dykk!

²Rikdomen dykkar er rotna, og klædi dykkar er mòl-etne;

³gullet og sylvet dykkar er burtrusta, og rusti på det skal vera til vitne imot dykk og eta dykkar kjøt som ein eld. De hev sanka skattar i dei siste dagane!

⁴Sjå, den løni de hev halde att for dei arbeidarar som hev skore åkrane dykkar, ho ropar, og ropet frå skurdfolket er kome inn for Herren Sebaots øyro.

⁵De hev levt på jordi i kjæla og etter lystene dykkar; de hev gjødt hjarto dykkar på slaktardagen!

⁶De hev domfelt og drepe den rettferdige; ingen gjer motstand mot dykk.

⁷Ver då tolmodige, brør, til Herren kjem! Sjå bonden ventar på den dyre avlingi av jordi og stundar tolmodeleg på henne, til ho fær haustregn og vårregn.

⁸Ver de og tolmodige og styrk hjarto dykkar! for Herrens tilkoma er nær.

⁹Sukka ikkje mot kvarandre, brør, so de ikkje skal verta dømde! Sjå, domaren stend for døri!

¹⁰Mine brør, tak profetane, som tala i Herrens namn, til fyredøme på lida vondt og vera tolmodige!

¹¹Sjå, me prisar dei sæle som lid tolmodeleg. De hev høyrt um Jobs tolmod og set endelykti frå Herren; for Herren er inderleg miskunnsam og mild.

¹²Men framfor alt, brør, sver ikkje, korkje ved himmelen eller ved jordi eller nokon annan eid! Med lat dykkar ja vera ja og dykkar nei vera nei, so de ikkje skal falla inn under domen!

¹³Lid nokon av dykk vondt, han bede! er nokon ved godt mod, han lovsyngje.

¹⁴Er nokon av dykk sjuk, han kalle til seg dei eldste i kyrkjelyden, og dei skal beda yver han og salva han med olje i Herrens namn;

¹⁵og den bøni av tru skal hjelpa den sjuke, og Herren skal reisa han upp; og hev han gjort synder, skal dei verta han forlatne.

¹⁶Sanna då syndene dykkar for kvarandre og bed for kvarandre, so de kann verta lækte! Rettferdig manns bøn hev stor makt i sin verknad.

¹⁷Elias var ein mann under same vilkår som me; og han bad at det ikkje skulde regna, og det regnde ikkje på jordi på tri år og seks månader.

¹⁸Og han bad på nytt, og himmelen gav regn, og jordi bar si grøda.

¹⁹Mine brør! Um nokon av dykk hev fare vilt frå sanningi, og nokon umvender han,

²⁰han skal vita at den som umvender ein syndar frå hans ville veg, han frelser ei sjel frå dauden og løyner ei mengd med synder.