Read nynorsk 1938 Peters fyrste brev 3 Bible Online

Peters fyrste brev 3 - nynorsk 1938 bible

Peters fyrste brev 3

¹Like eins de konor: De skal vera dykkar eigne menn undergjevne, so endå slike som ikkje trur ordet, må verta vunne utan ord ved den ferd konone deira syner,

²når dei ser for augo dykkar reine ferd i otte.

³Deira prydnad skal ikkje vera den som er utanpå, med hårflettingar eller påhengt gull eller kledebunad,

⁴men hjartans løynde menneske i den uforgjengelege prydnad med den mjuke og stille ånd, som er gjæv for Gud.

⁵For soleis prydde og fordom dei heilage kvinnone seg, dei som sette si von til Gud, og dei var sine eigne menn undergjevne,

⁶liksom Sara lydde Abraham og kalla han herre; hennar born hev de vorte når de gjer det gode og ikkje ottast for nokor skræmsla.

⁷Like eins de menn: De skal leva vitugt saman med konone dykkar som det veikare kjerald, og visa dei æra, sidan dei og er medervingar til livsens nåde, so bønene dykkar ikkje skal verta hindra.

⁸Og til slutt: Ver alle samhugna, medlidande, kjærlege mot brørne, miskunnsame, audmjuke!

⁹Løn ikkje vondt med vondt eller skjelling med skjelling, men tvert imot velsigna! for det vart de kalla til, at de skal erva velsigning.

¹⁰For den som vil elska livet og sjå gode dagar, han skal halda tunga frå det som vondt er, og lippone frå svikefull tale;

¹¹han vende seg frå vondt og gjere godt, han søkje fred og trå etter han!

¹²For Herrens augo er yver dei rettferdige, og hans øyro vende til deira bøn; men Herrens åsyn er yver dei som gjer vondt.

¹³Og kven er det som kann gjera dykk vondt når de legg vinn på det som er godt?

¹⁴Men um de og skulde lida for rettferds skuld, so er de sæle. Men ottast ikkje for dei og reddast ikkje; men helga Kristus som Herre i hjarto dykkar,

¹⁵og ver alltid ferdige til å forsvara dykk for kvar ein som krev rekneskap av dykk for den voni som bur i dykk, men med spaklynde og age

¹⁶og med eit godt samvit, so dei som lastar dykkar gode ferd i Kristus, må verta til skammar i det som dei baktalar dykk for som illgjerdsmenn.

¹⁷For det er betre, um so er Guds vilje, å lida når ein gjer godt, enn når ein gjer vondt.

¹⁸For Kristus leid og EIN gong for synder, ein rettferdig for urettferdige, so han kunde føra oss fram til Gud, han som leid dauden i kjøtet, men vart levandegjort i åndi;

¹⁹i åndi gjekk han og burt og preika for åndene som var i varetekt,

²⁰dei som fordom hadde vore stride, den gong Guds langmod venta i Noahs dagar, medan arki vart bygd, der nokre få - åtte sjeler - vart frelste gjenom vatn,

²¹det som no og frelser oss i motbiletet sitt, dåpen, som ikkje er avleggjing av ureinskap på kroppen, men eit godt samvits pakt med Gud ved Jesu Kristi uppstoda,

²²han som er uppfaren til himmelen og er ved Guds høgre hand, der englar og makter og krafter er han underlagde.