Read nynorsk 1938 Peters fyrste brev 4 Bible Online

Peters fyrste brev 4 - nynorsk 1938 bible

Peters fyrste brev 4

¹Sidan no Kristus hev lide i kjøtet, so væpna de dykk med den same tanken, at den som hev lidi i kjøtet, er ferdig med syndi,

²so de ikkje lenger skal leva etter menneskelyster, men etter Guds vilje, den tid de endå skal vera i kjøtet.

³For det er nok at de i den framfarne livstid hev gjort det som heidningane vil, med di de ferdast i used, lyster, fullskap, svir, drykk og skamleg avgudsdyrking;

⁴difor undrast dei når de ikkje regner med dei ut i den same straum av skamløysa, og spottar dykk.

⁵Men dei skal gjera rekneskap for han som held seg ferdig til å døma levande og daude.

⁶For difor vart evangeliet forkynt ogso for daude at dei vel skulde verta dømde som menneske i kjøtet, men leva so som Gud i åndi.

⁷Men enden på alle ting er komen nær. Ver difor vislege og edrue so de kann beda!

⁸Og hav framfor alt inderleg kjærleik til kvarandre! for kjærleiken løyner ei mengd med synder.

⁹Ver gjestmilde mot kvarandre utan knurring.

¹⁰Etter som kvar hev fenge ei nådegåva, so ten kvarandre med henne som gode hushaldarar yver Guds mangfaldige nåde:

¹¹um nokon talar, han tale som Guds ord; um nokon tener i kyrkjelyden, han tene som av den kraft Gud gjev, so Gud må verta æra i alle ting ved Jesus Kristus, han som æra og makti høyrer til i all æva. Amen.

¹²De kjære, undra dykk ikkje yver den elden som kjem yver dykk til prøving, som um det hende dykk noko underleg!

¹³men i same mun som de hev lut i Kristi lidingar, skal de gleda dykk, so de og kann gleda dykk med fagnad når hans herlegdom vert openberra.

¹⁴Dersom de vert hædde for Kristi namn skuld, er de sæle; for Herlegdoms-Anden og Guds Ande kviler yver dykk.

¹⁵For ingen av dykk må lida av di han er mordar eller tjuv eller illgjerningsmann, eller av di han er legg seg upp i slikt som ikkje kjem han ved.

¹⁶Men lid han av di han er ein kristen, so skal han ikkje skjemmast, men prisa Gud for dette namnet.

¹⁷For det er no den tid då domen skal taka til med Guds hus; men tek det til med oss, kva vert då enden for dei som ikkje vil tru Guds evangelium?

¹⁸Og dersom den rettferdige vandt vert frelst, kvar skal det då verta av den ugudlege og syndaren?

¹⁹Difor skal og dei som etter Guds vilje lyt lida, gjeva yver sjelene sine til den trufaste skaparen, med di dei gjer det gode.