Read nynorsk 1938 Peters andre brev 1 Bible Online

Peters andre brev 1 - nynorsk 1938 bible

Peters andre brev 1

¹Simeon Peter, Jesu Kristi tenar og apostel - til dei som hev fenge same dyre tru som me ved vår Gud og frelsar Jesu Kristi rettferd:

²Nåde og fred vere med dykk i rikt mål, med di de kjenner Gud og Jesus, vår Herre!

³Etter di hans guddomelege makt hev gjeve oss alt som tener til liv og gudlegdom, ved kunnskapen um han som kalla oss ved sin eigen herlegdom og si kraft

⁴og dermed hev gjeve oss dei største og dyraste lovnader, for at de ved dei skulde få lut i guddomleg natur, med di de flyr frå den tyning i verdi som kjem av lysti,

⁵so gjer dykk og just difor all umak, og vis i trui dykkar dygd, og i dygdi skynsemd,

⁶og i skynsemdi fråhald, og i fråhaldet tålmod, og i tolmodet gudlegdom,

⁷og i gudlegdomen broderkjærleik, og i broderkjærleiken kjærleik til alle.

⁸For når desse ting finst hjå dykk og fær veksa, då visar dei at de ikkje er yrkelause eller fruktlause i kunnskapen um vår Herre Jesus Kristus;

⁹for den som ikkje hev desse ting, han er blind, dimsynt, med di han hev gløymt reinsingi frå sine fyrre synder.

¹⁰Difor, brør, legg so mykje meir vinn på å gjera dykkar kall og utveljing fast! for når de gjer desse ting, skal de slett ikkje snåva;

¹¹for på denne måten skal det rikleg verta gjeve dykk inngang i vår Herre og frelsar Jesu Kristi ævelege rike.

¹²Difor kjem eg alltid til å minna dykk um dette, endå de veit det og er grunnfeste i sanningi, som er hjå dykk.

¹³Lika vel held eg det for rett å vekkja dykk ved påminning, so lenge eg er i denne hytta,

¹⁴sidan eg veit at eg brått skal leggja ned hytta mi, so som og vår Herre Jesus Kristus varsla meg.

¹⁵Men eg vil leggja vinn på at de til kvar tid etter min burtgang kann minnast dette.

¹⁶For det var ikkje klokt uttenkte eventyr me fylgde då me kunngjorde dykk vår Herre Jesu Kristi makt og atterkoma, men me hadde vore augvitne til hans storvelde.

¹⁷For han fekk æra og herlegdom av Gud Fader, med di ei slik røyst kom til han frå den høgste herlegdomen: Dette er Son min, han som eg elskar, han som eg hev hugnad i,

¹⁸og denne røysti høyrde me koma frå himmelen då me var saman med han på det heilage fjellet.

¹⁹Og dess fastare hev me det profetiske ordet, og de gjer vel i å akta på det som på eit ljos som skin på ein myrk stad, til dess dagen lyser fram og morgonstjerna renn upp i hjarto dykkar,

²⁰men di de fyrst og fremst veit dette at inkje profetord i skrifti er gjeve til eigi tyding;

²¹for aldri er noko profetord framkome av mannsvilje, men dei Heilage Guds menn tala drivne av den Heilage Ande.