Read nynorsk 1938 Peters andre brev 2 Bible Online

Peters andre brev 2 - nynorsk 1938 bible

Peters andre brev 2

¹Men det stod og falske profetar fram hjå folket, liksom det og hjå dykk skal koma falske lærarar, som skal lura inn ranglæror som fører til fortaping, med di dei jamvel neittar den Herre som kjøpte dei, og fører yver seg sjølve ei brå fortaping.

²Og mange skal fylgja dei i deira used, og for deira skuld skal sanningsvegen verta spotta,

³og av havesykja skal dei med uppdikta ord nytta dykk ut til vinning for seg. Men domen yver dei er frå gamal tid ikkje yrkelaus, og deira fortaping søv ikkje.

⁴For so visst som Gud ikkje sparde englar då dei synda, men støytte dei ned i avgrunnen og gav dei yver til myrkers holor i varetekt til dom,

⁵og ikkje sparde den gamle verdi, men helt uppe rettferds-forkynnaren Noah sjølv-åttande, då han førde storflodi yver ei verd av ugudlege,

⁶og la byane Sodoma og Gomorra i oska og fordømde dei til undergang, og dermed hev sett dei til fyredøme på dei ugudlege i framtidi,

⁷og fria ut den rettferdige Lot, som leid under den skamlause åtferdi av dei ugudlege

⁸- for den rettferdige som budde imillom dei, leid dagstødt pinsla i si rettferdige sjel ved dei lovlause gjerningar som han såg og høyrde -

⁹so visst veit Herren å fria dei gudlege ut or freisting, men halda dei urettferdige i varetekt med refsing til domedag,

¹⁰mest dei som fer etter kjøt i urein lyst og vanvyrder herredøme. Dei sjølvgode vågehalsar! Dei skjelv ikkje ved å spotta høge makter,

¹¹medan då englar, som er større i styrke og makt, ikkje ber fram for Herren nokon spottande dom imot dei;

¹²men desse, liksom vitlause dyr, av naturi fødde til fanging og undergang - dei skal og, av di dei spottar det dei ikkje kjenner, ganga under i si vanart

¹³og få urettferds løn. Dei set si lyst i å bruka dagen til kjæla; desse utskjemmor og skamflekker, dei fråssar i sitt svik når dei held gilde med dykk.

¹⁴Augo hev dei som er fylde av skjøkja og umetteleg i synd; dei forlokkar ustøde sjeler; dei hev et hjarta som er upptamt i havesykja, dei forbanningsborn!

¹⁵Dei hev vike frå den beine vegen og fare vilt, med di dei hev fylgt Bileams Beorssons veg, han som elska urettferd løn

¹⁶og fekk refsing for sitt eige brot: eit umælande kløvdyr tala med mannemæle til han og hindra profeten i hans uvitingskap.

¹⁷Desse er vasslause brunnar, skodda som vert drive av stormvind; til dei er kolmyrket ferdigt.

¹⁸For med di dei talar skrøytande, tome ord, forlokkar dei i kjøtlyster ved ukjurskap dei som nett hev flytt ifrå dei som fer i villa,

¹⁹med di dei lovar dei fridom, dei som sjølve er trælar under vanarti; for det som ein ligg under for, det hev han og vorte træl for.

²⁰For um dei hev flytt ifrå ureinskapen i verdi med di dei hev lært å kjenna vår Herre og frelsar Jesus Kristus, og so atter let seg fanga av han og ligg under, då hev det siste vorte verre med dei enn det fyrste.

²¹For det var betre for dei at dei ikkje hadde kjent rettferds veg, enn at dei kjende han og so vende seg burt frå det heilage bodet som var yvergjeve dei.

²²Det hev gjenge dei etter det sanne ordtøket: Ein hund vendar att til si eigi spya, og ei lauga su velter seg i søyla.