Read nynorsk 1938 Johannes' fyrste brev 5 Bible Online

Johannes' fyrste brev 5 - nynorsk 1938 bible

Johannes' fyrste brev 5

¹Kvar den som trur at Jesus er Kristus, han er fødd av Gud, og kvar den som elskar Faderen, han elskar og den som er fødd av han.

²På dette kjenner me at me elskar Guds born, når me elskar Gud og held hans bod.

³For dette er kjærleiken til Gud at me held hans bod; og hans bod er ikkje tunge.

⁴For alt som er født av Gud, det sigrar yver verdi; og dette er den siger som hev sigra yver verdi: vår tru.

⁵Kven er det som sigrar yver verdi, utan den som trur at Jesus er Guds Son?

⁶Han er den som kom med vatn og blod, Jesus Kristus; ikkje berre med vatnet, men med vatnet og blodet, og Anden er den som vitnar, for Anden er sanningi.

⁷For dei er tri som vitnar:

⁸Anden og vatnet og blodet, og desse tri gjeng ut på eitt.

⁹Tek me imot vitnemål av menneski, so er Guds vitnemål større; for dette er Guds vitnemål at han hev vitna um Son sin.

¹⁰Den som trur på Guds Son, hev vitnemålet i seg sjølv; den som ikkje trur Gud, hev gjort han til ein ljugar, av di han ikkje hev trutt det vitnemålet som Gud hev vitna um Son sin.

¹¹Og dette er vitnemålet at Gud hev gjeve oss æveleg liv, og dette livet er i Son hans.

¹²Den som hev Sonen, hev livet; den som ikkje hev Guds Son, han hev ikkje livet.

¹³Dette hev eg skrive til dykk so de skal vita at de hev æveleg liv, de som trur på Guds Sons namn.

¹⁴Og dette er den frimodige tiltru me hev til han, at dersom me bed um noko etter hans vilje, so høyrer han oss;

¹⁵og dersom me veit at han høyrer oss, kva me so bed um, so veit me at me hev dei ting som me hev bede han um.

¹⁶Dersom nokon ser bror sin gjera ei synd som ikkje er til dauden, so skal han beda, og han skal gjeva han liv - eg meiner dei som ikkje syndar til dauden. Det finst synd som fører åt dauden; det er ikkje um henne eg segjer han skal beda.

¹⁷All urettferd er synd, og det finst synd som ikkje er til dauden.

¹⁸Me veit at kvar den som er fødd av Gud, syndar ikkje; men den som er fødd av Gud, varar seg, og den vonde rører honom ikkje.

¹⁹Me veit at me er av Gud, og all verdi ligg i det vonde;

²⁰men me veit at Guds Son er komen, og han hev gjeve oss skyn til å kjenna den Sanne, og me er i den Sanne, i hans Son Jesus Kristus. Han er den sanne Gud og det ævelege livet.

²¹Born, vara dykk for avgudane!