Read nynorsk 1938 Domarane 10 Bible Online

Domarane 10 - nynorsk 1938 bible

Domarane 10

¹Etter Abimelek stod Tola fram og berga Israel. Han var son åt Pua Dodoson av Issakars-ætti, og budde i Samir på Efra'imsfjellet.

²Han styrde i Israel i tri og tjuge år. So døydde han og vart gravlagd i Samir.

³Etter han stod Ja'ir frå Gilead fram og styrde Israel i tvo og tjuge år.

⁴Han hadde tretti søner; dei reid på tretti asenfolar og åtte tretti tjeldbyar, som endå i dag vert kalla Ja'irsbyane; dei ligg i Gileadlandet.

⁵Då Ja'ir døydde, vart han gravlagd i Kamon.

⁶Men Israels-borni gjorde atter det som var Herren imot, og dyrka Ba'alane og Astarte-bileti og Arams-gudane og Sidons-gudane og Moabs-gudane og ammonitargudane og filistargudane; dei vende seg frå Herren og dyrka ikkje han.

⁷Då vart Herren brennande harm på Israel. Han slepte dei i hendene på filistarane og ammonitane,

⁸og dei tok same året til å trengja og trælka Israels-borni; i attan år trengde dei alle Israels-borni som budde på hi sida Jordan, i Amoritarlandet, i Gilead.

⁹Ammons-borni sette jamvel yver Jordan og stridde mot Juda og Benjamin og mot Efra'ims-ætti, og Israel kom i stor naud.

¹⁰Då ropa Israels-borni til Herren og sa: Me hev synda mot deg! Me hev vendt oss frå vår Gud og dyrka Ba'alane.

¹¹Og Herren sa til Israels-borni: Hev eg ikkje berga dykk frå egyptarane og frå amoritane, frå Ammons-borni og frå filistarane?

¹²Og då sidonarane og amalekitane og maonitane plaga dykk, og de ropa til meg, berga eg dykk frå dei og.

¹³Men de vende dykk frå meg og dyrka andre gudar; difor vil eg ikkje hjelpa dykk meir.

¹⁴Gakk burt og kalla på dei gudane som de hev valt! Lat dei hjelpa dykk no de er i slik naud!

¹⁵Då sa Israels-borni til Herren: Me hev synda! Gjer med oss som du synest, berre du vil hjelpa oss denne gongen!

¹⁶So hadde dei frå seg dei framande gudane og tente Herren; då kunde han ikkje tola å sjå på Israels naud.

¹⁷Ammons-borni baud ut heren sin og lægra seg i Gilead. Då samla Israels-borni seg og slo læger i Mispa.

¹⁸Og herfolket, Gileads-hovdingane, sa seg imillom: Kvar er den mannen som vil ganga fyrst i striden mot ammonitane? Han skal vera hovding yver alle Gileads-buane.