Read nynorsk 1938 Domarane 15 Bible Online

Domarane 15 - nynorsk 1938 bible

Domarane 15

¹Då det leid um ei tid, og dei hadde teke til med kveiteskurden, kom Samson og vilde lydast til kona si. Han hadde med seg eit kje og sa: Lat meg få koma inn i kammerset til kona mi! Men far hennar vilde ikkje gjeva han lov til det

²og sa: Eg tenkte so visst at du ikkje lika henne meir, og so gav eg henne til brursveinen din. Kann du ikkje taka den yngre systeri i staden? Ho er då mykje venare!

³Då sa Samson: Denne gongen er eg saklaus um eg gjer filistarane vondt.

⁴Han gjekk av og fanga tri hundrad revar, fann seg faklar, batt revane i hop etter rovone, tvo og tvo, og feste ein fakkel millom kvart rovepar.

⁵So kveikte han eld i faklane og slepte revane inn på åkrane åt filistarane. Soleis brende han upp alt kornet dei hadde ute, både skore og uskore, og alle oljehagar.

⁶Då spurde filistarane: Kven hev gjort dette? Folk svara: Samson, mågen åt timniten. Det var for di verfaren hadde teke kona hans og gjeve til brursveinen. So for filistarane derupp og brende inne både kona og far hennar.

⁷Då sa Samson til dei: Fer de soleis åt, so skal eg visst ikkje kvila fyrr eg fær hemnt meg på dykk.

⁸So slo han dei so dei stupte i kross og i krok, og det vart eit stort mannefall på dei. Sidan for han ned til Etamdjuvet og gav seg til der.

⁹Då kom filistarane upp i Judafylket og lægra seg der, og dei spreidde seg utyver i Leki.

¹⁰Og Juda-mennene sa: Kvi kjem de hit og tek på oss? Dei svara: Me vil binda Samson og gjera like eins mot han som han hev gjort mot oss.

¹¹So for tri tusund mann av Juda-ætti ned til Etamdjuvet, og dei sa til Samson: Veit du ikkje at filistarane råder her i landet? Kvi hev du då gjort oss dette? Han svara: Som dei gjorde mot meg, so hev eg gjort mot dei.

¹²Då sa dei: Me er komne hit for å binda deg og gjeva deg i hendene på filistarane. Samson sa: Lova meg at ikkje de vil slå meg i hel!

¹³Dei svara: Nei, me vil berre binda deg og gjeve deg i hendene deira; me vil ikkje drepa deg. So batt dei han med tvo nye reip og førde han upp or djuvet.

¹⁴Då han kom til Leki, sprang filistarane imot han med glederop. Då kom Herrens Ande yver han, og reipi på armane hans vart som brend tråd; bandi datt av hendene hans som dei var morkna.

¹⁵So fann han eit friskt kjakebein av eit asen; det greip han og slo i hel tusund mann med det.

¹⁶Då sa Samson: Med asenkjaken slo eg ein hop og tvo; med asenkjaken slo eg tusund mann.

¹⁷Då han hadde sagt dette, kasta han kjakebeinet frå seg, og sidan kalla dei den staden Ramat-Leki. /[10]

¹⁸Men so vart han so brennande tyrst. Då ropa han til Herren og sa: Du hev hjelpt tenaren din til å vinna denne store sigeren! Skal eg no døy av torste og falla i hendene på dei u-umskorne?

¹⁹Då opna Gud den hola som er i Leki, og det rann vatn utor henne, so han fekk drikka; då rådde han atti og kvikna til. Difor kalla dei den kjelda En-Hakkore; ho er endå i Leki. /[11]

²⁰Samson styrde Israel i tjuge år; det var i filistartidi.