Read nynorsk 1938 Johannes' openberring 17 Bible Online

Johannes' openberring 17 - nynorsk 1938 bible

Johannes' openberring 17

¹Og ein av dei sju englane som hadde dei sju skålene, kom og tala med meg og sa: Kom, eg skal visa deg domen yver den store skjøkja, som sit yver mange vatn,

²henne som kongane på jordi hora med, og dei som bur på jordi, vart drukne av hennar hordoms vin.

³Og han førde meg i åndi burt i ei øydemark, og eg såg ei kvinna sitja på eit skarlakraudt dyr, som var fullt med spottings-namn og hadde sju hovud og ti horn.

⁴Og kvinna var klædd i purpur og skarlak og lyste av gull og dyre steinar og perlor; ho hadde i handi ei gullskål full med styggedom og med ureinska av hordomen hennar,

⁵og på panna hennar var skrive eit namn, ein løyndom: Babylon, den store, mor åt skjøkjone og styggedomane på jordi.

⁶Og eg såg kvinna fullskjenkt med blodet av dei heilage og med blodet av Jesu vitne, og eg undra meg storleg då eg såg henne.

⁷Og engelen sa til meg. Kvi undra du deg? Eg vil segja deg løyndomen med kvinna og med dyret som ber henne, og som hev dei sju hovudi og dei ti horni.

⁸Det dyret du såg, det var og er ikkje, og det skal stiga upp or avgrunnen og fara burt til undergang; og dei som bur på jordi, dei som ikkje hev namni sine skrivne i livsens bok frå verdi vart grunnlagd, dei skal undra seg når dei ser at dyret var og ikkje er og skal koma att.

⁹Her spørst det um det vitet som hev visdom! Dei sju hovudi er sju fjell, som kvinna sit på,

¹⁰og dei er sju kongar; dei fem er falne, den eine er til, den andre er ikkje komen endå; og når han kjem, skal han berre halda seg ei stutt tid.

¹¹Og dyret som var og ikkje er, det er sjølv den åttande, og er og ein av dei sju, og fer burt til undergang.

¹²Og dei ti horni som du såg, er ti kongar som ikkje endå hev fenge rike, men dei fær makt som kongar ein time saman med dyret.

¹³Desse hev same tanken, og si kraft og makt gjev dei til dyret.

¹⁴Desse skal strida mot Lambet, og Lambet skal vinna yver dei, for di det er herren yver herrar og kongen yver kongar, og dei som er med det, dei som er kalla og utvalde og trufaste.

¹⁵Og han sa til meg: Dei vatni som du såg der skjøkja sit, er landslydar og flokkar og folk og tungemål.

¹⁶Og dei ti horni som du såg, og dyret, desse skal hata skjøkja og gjera henne aud og naki, og kjøtet hennar skal dei eta, og henne sjølv skal dei brenna upp med eld.

¹⁷For Gud gav dei i hjarta på fullføra hans tanke, og å fullføra den eine og same tanken, og å gjeva dyret sitt rike, til dess Guds ord er fullførde.

¹⁸Og kvinna som du såg, er den store byen som hev kongevelde yver kongane på jordi.