Read nynorsk 1938 Johannes' openberring 21 Bible Online

Johannes' openberring 21 - nynorsk 1938 bible

Johannes' openberring 21

¹Og eg såg ein ny himmel og ei ny jord; for den fyrste himmelen og den fyrste jordi hadde kvorve burt, og havet er ikkje meir.

²Og eg såg den heilage byen, det nye Jerusalem, stiga ned ifrå himmelen frå Gud, budd som ei brur som er prydd for brudgomen sin.

³Og eg høyrde ei høg røyst frå kongsstolen, som sa: Sjå, Guds bustad er hjå menneski, og han skal bu hjå dei; og dei skal vera hans folk, og Gud sjølv skal vera hjå dei og vera deira Gud.

⁴Og han skal turka kvar tåra av augo deira, og dauden skal ikkje meir vera til, og ikkje sorg og ikkje skrik og ikkje pinsla skal meir vera til; for dei fyrste ting er burtfarne.

⁵Og han som sat på kongsstolen sa: Sjå, eg gjer alle ting nye! Og han segjer til meg: Skriv! for desse ordi er truverdige og sanne.

⁶Og han sa til meg: Det er gjort. Eg er Alfa og Omega, upphavet og enden. Eg vil gjeva den tyrste av kjelda med livsens vatn for inkje.

⁷Den som sigrar, skal erva alle ting, og eg vil vera hans Gud, og han skal vera min son.

⁸Men dei som er reddhuga og vantruande og styggelege og manndråparar og horkarar og trollmenn og avgudsdyrkarar, og alle ljugarar, deira lut skal vera i sjøen som brenn med eld og svovel; det er den andre dauden.

⁹Og ein av dei sju englane som hadde dei sju skålene, fyllte med dei sju siste plagone, kom til meg og tala med meg og sa: Kom, eg skal visa deg bruri, vivet åt Lambet!

¹⁰Og han førde meg i åndi burt på eit stort og høgt fjell og viste meg den heilage byen Jerusalem, som steig ned ifrå himmelen frå Gud.

¹¹Byen hadde Guds herlegdom, og hans ljos var som den dyrverdigste stein, som krystallblank jaspis.

¹²Og han hadde ein stor og høg mur; han hadde tolv portar, og på portane tolv englar og innskrivne namn, namni på dei tolv ætter av Israels-borni;

¹³mot aust var tri portar, mot nord tri portar, mot sud tri portar, mot vest tri portar.

¹⁴Og muren um byen hadde tolv grunnsteinar, og på dei namni på dei tolv apostlane åt Lambet.

¹⁵Og han som tala med meg, hadde ei gullrøyr til å mæla byen og portane og muren.

¹⁶Og byen ligg i ein firkant, og lengdi på han er so stor som breiddi. Og han mælte byen med røyri: tolv tusund stadier; lengdi og breiddi og høgdi på han er like.

¹⁷Og han mælte muren ikring han: eit hundrad og fire og fyrti alner, etter menneskemål, som og er englemål.

¹⁸Og muren var bygd av jaspis, og byen var av reint gull, lik reint glas.

¹⁹Og grunnsteinane i bymuren var prydde med allslags dyre steinar: den fyrste grunnsteinen var jaspis, den andre safir, den tridje kalkedon, den fjorde smaragd,

²⁰den femte sardonyks, den sette sarder, den sjuande krysolit, den åttande beryll, den niande topas, den tiande krysopras, den ellevte hyasint, den tolvte ametyst.

²¹Og dei tolv portane var tolv perlor; kvar ein av portane var av EI perla, og gata i byen var reint gull, som klårt glas.

²²Og eg såg ikkje noko tempel i han; for hans tempel er Herren Gud, den allmektige, og Lambet.

²³Og byen treng ikkje soli eller månen til å skina åt seg; for Guds herlegdom upplyser han, og Lambet er hans ljos.

²⁴Og folkeslagi skal ferdast i hans ljos, og kongane på jordi ber sin herlegdom inn i han.

²⁵Og portane hans skal aldri verta stengde um dagen; for natt skal ikkje vera der.

²⁶Og dei skal bera herlegdomen og æra åt folkeslagi inn i han.

²⁷Og inkje ureint skal koma inn i han, og ingen som fer med styggedom og lygn, men berre dei som er innskrivne i livsens bok hjå Lambet.