Read nynorsk 1938 Fyrste Samuelsbok 13 Bible Online

Fyrste Samuelsbok 13 - nynorsk 1938 bible

Fyrste Samuelsbok 13

¹Saul hadde då vore konge eitt år. Då han hadde vore konge yver Israel i tvo år,

²valde han seg ut tri tusund mann av Israels-folket; av dei hadde han tvo tusund hjå seg i Mikmas og i Betelfjelli, og eitt tusund var med Jonatan i Gibea i Benjaminsfylket. Alt hitt folket sende han frå seg og let dei fara heim att.

³Jonatan hogg ned filistarvakti i Geba, og filistarane fekk spurt det. Men Saul let luren ljoma yver heile landet og sa: Hebrearane skal høyra det.

⁴Heile Israel fekk høyra at Saul hadde hogge ned filistarvakti, og at filistarane var arge på Israels-folket for det same. Og folket vart utbode til å fylgja Saul til Gilgal.

⁵Filistarane samla seg og vilde strida mot Israel; dei hadde tretti tusund vogner og seks tusund hestfolk, og fotfolk so mange som sanden på havsens strand; og dei drog upp og slo læger ved Mikmas, attanfor Bet-Aven.

⁶Då no Israels-mennene såg kva fåre dei var i, av di filistarane trengde på, då løynde folket seg i hellerar og klungerkjørr og gjel og tårn og brunnar.

⁷Sume av hebrearane gjekk yver Jordan til Gad- og Gileadlandet; men Saul var enno i Gilgal, og alt folket fylgde han skjelvande.

⁸Han venta sju dagar - til den tidi Samuel hadde sett, men Samuel kom ikkje til Gilgal, og folket tok til å spreida seg og ganga frå han.

⁹Då sa Saul: Kom hit til meg med brennofferet og takkofferet! Og so bar han fram brennofferet.

¹⁰Men då han vel hadde bore fram brennofferet, då kom Samuel, og Saul gjekk til møtes med han og vilde beda han vera velkomen.

¹¹Då sa Samuel: Kva hev du gjort? Saul svara: Då eg såg at folket tok til å spreida seg og ganga frå meg, og du ikkje kom til den tidi som var sett, og filistarane samla seg ved Mikmas,

¹²so tenkte eg: No kjem filistarane ned til Gilgal og tek på meg fyrr eg hev fenge blidka Herren, og so våga eg meg til å bera fram brennofferet.

¹³Då sa Samuel til Saul: Du hev fare uvetugt åt, du hev ikkje lydt det bodet som Herren din Gud la på deg; hadde du gjort det, so hadde Herren no stadfest kongedømet ditt yver Israel for all tid.

¹⁴Men no skal kongedømet ditt ikkje standa ved lag; Herren hev leita seg ut ein mann etter sitt hjarta, og han hev Herren etla til fyrste yver folket sitt, av di du ikkje hev lydt det bodet som Herren la på deg.

¹⁵So gjorde Samuel seg reidug og for frå Gilgal upp til Gibea i Benjaminsfylket, og Saul mynstra herfolket han hadde med seg - det var um lag seks hundrad mann.

¹⁶So låg då Saul og Jonatan, son hans, I Geba i Benjaminsfylket med det herfolket som var hjå dei, og filistarane hadde lægra seg ved Mikmas.

¹⁷Då drog det ein flokk ut frå filistarlægret og skulde herja i landet; han var skift i tri hopar; ein hop tok leidi til Ofra i Sualbygdi,

¹⁸ein stemnde til Bet-Horon, og ein tok inn på vegen til den bygdi som ris upp yver Sebo'imdalen, der det ber burtimot øydemarki.

¹⁹Den gongen fanst det ingen smed i heile Israelslandet; for filistarane hadde ikkje vilja at hebrearane skulde få gjera seg sverd eller spjot.

²⁰Difor laut kvar mann i Israel fara ned til filistarane når han vilde få smidd seg plogjarn eller grev eller øksar eller ristlar,

²¹eller når eggi var skjemd på plogjarni eller grevi eller greipene eller øksane, eller når han skulde få sett på ein pigg.

²²Soleis gjekk det til at den dagen då striden stod, fanst det korkje sverd eller spjot hjå nokon av dei folki som var med Saul og Jonatan; Berre Saul og Jonatan hadde slike våpen.

²³Filistarane skaut ein av utpostane sine fram til Mikmasskardet.