Read nynorsk 1938 Fyrste Samuelsbok 28 Bible Online

Fyrste Samuelsbok 28 - nynorsk 1938 bible

Fyrste Samuelsbok 28

¹I same tidi bar det so til at filistarane samla herane sine og vilde draga i strid mot Israel. Då sa Akis til David: Du veit vel at du lyt fylgja meg i striden, både du og mennene dine.

²David svara: Vel, då skal du få sjå kor mykje tenaren din skal gjera. Akis sa: Vel, so set eg deg til hovding yver livvakti mi for all tid.

³Samuel var då avliden, og heile Israel hadde halde syrgjefest etter han og gravlagt han i Rama, heimbyen hans. Og Saul hadde drive ut or landet dei som for med å mana fram daudingar og spåvette.

⁴Då filistarane hadde samla seg, drog dei fram til Sunem og lægra seg der. Då samla Saul heile Israel, og dei lægra seg på Gilboa.

⁵Men då Saul såg filisterlægret, vart han so redd at hjarta skalv i han.

⁶Han spurde Herren; men Herren svara han ikkje, korkje i draumar eller med urim eller gjenom profetar.

⁷So sa han til mennene sine: Finn meg ei kvinna som fer med å mana fram daudingar, so vil eg ganga til henne og spyrja henne! Mennene svara: I En-Dor er ei kvinna som kann mana.

⁸Då skifte han klæde og hama seg til so ingen kunde kjenna han, og so gjekk han i veg; det var tvo mann med han. Dei kom til kvinna um natti, og Saul sa: Kjære, hjelp meg til ein spådom med manarkunsti di, og henta upp til meg den som eg nemner for deg!

⁹Kvinna svara: Du veit då sjølv kva Saul hev gjort - at han hev rudt ut or landet alle som for med å mana fram daudingar og spåvette. Kvifor set du då ei snara for meg, so eg kjem til å lata livet?

¹⁰Då svor Saul henne ein eid ved Herren og sa: So visst som Herren lever: Det skal ikkje koma nokor skuld på deg for dette.

¹¹Kvinna spurde: Kven er det eg skal henta upp til deg? Han svara: Samuel.

¹²Men då kvinna såg Samuel, skreik ho ende yver seg og sa til Saul: Kvifor hev du narra meg? Du er Saul!

¹³Då sa kongen til henne: Ver ikkje redd! Men kva var det du såg? Kvinna svara: Eg såg ein gud som steig upp or jordi.

¹⁴Saul spurde: Korleis ser han ut? Ho svara: Det er ein gamal mann som stig upp, og han er sveipt i et kåpa. Då skyna Saul at det var Samuel, og han kasta seg ned med andletet mot jordi.

¹⁵Og Samuel sa til Saul: Kvifor hev du uroa meg og henta meg upp? Saul svara: Eg er i stor naud; filistarane søkjer på meg, og Gud hev vike frå meg og svarar meg ikkje meir, korkje gjenom profetar eller i draumar; difor kalla eg på deg, so du skulde lata meg få vita kva eg skal gjera.

¹⁶Då sa Samuel: Kvifor spør du då meg, når Herren hev vike frå deg og vorte din uven?

¹⁷No hev Herren gjort det som han tala um gjenom meg - Herren hev rive kongedømet ut or di hand og gjeve det til ein annan, til David.

¹⁸For di du ikkje lydde Herren og ikkje let hans logande vreide få øyda Amalek, difor hev Herren gjort dette mot deg i dag.

¹⁹Saman med deg skal Herren gjeva Israel og i hendene på filistarane, og i morgon skal du og sønene dine vera hjå meg; Israelslægret skal Herren og gjeva i hendene på filistarane.

²⁰Då stupte Saul med ein gong i koll so lang han var, slik redsla kom det yver han då han høyrde ordi hans Samuel; ingi makt var det i han heller, for han hadde ikkje smaka mat heile dagen og heile natti.

²¹Kvinna kom burtåt han, og då ho såg kor forfærd han var, sa ho til han: Eg lydde deg, herre konge, og våga livet mitt og gjorde som du sa til meg.

²²So lyd no du og meg, herre, og lat meg få setja fram ein bete mat åt deg, og et det, so du kann styrkjast til du skal taka i veg att!

²³Men han baud av og sa: Eg vil ikkje hava noko mat. Då nøydde dei han, både mennene hans og kvinna, til han lydde dei. Han reis upp og sette seg på sengi.

²⁴Kvinna hadde ein gjødkalv standande inne; den skunda ho seg og slakta. So tok ho mjøl og knoda og baka hellekakor.

²⁵Med so gjort bar ho på bordet åt Saul og mennene hans, og dei åt; sidan reis dei upp og for sin veg same natti.