Read nynorsk 1938 Fyrste Samuelsbok 31 Bible Online

Fyrste Samuelsbok 31 - nynorsk 1938 bible

Fyrste Samuelsbok 31

¹Filistarane gjekk på i striden mot Israel. Israels-mennene rømde for dei, og det låg mange falne på Gilboafjellet.

²Filistarane sette etter Saul og sønene hans og felte Jonatan og Abinadab og Malkisua, Sauls-sønene.

³Striden vart hard ikring Saul; bogeskyttarane kom yver han, og han vart so redd skyttarane at han skalv.

⁴Då sa han til våpensveinen sin: Drag sverdet ditt og renn det igjenom meg, so ikkje desse u-umskorne skal koma og stinga meg i hel og skamfara meg! Men våpensveinen vilde ikkje gjera det - han torde ikkje. So tok Saul sverdet sitt og stupte seg på det;

⁵og då våpensveinen såg at han var slokna, stupte han seg og på sitt sverd og fylgde Saul i dauden.

⁶Soleis døydde Saul og dei tri sønene hans og våpensveinen og alle mennene hans på ein og same dagen.

⁷Og då Israels-mennene som budde på hi sida av dalen, og dei som budde på Jordansida, såg at Israels-mennene hadde rømt, og at Saul og sønene hans var falne, tok dei ut og rømde frå byane sine, og filistarane kom og slo seg ned der.

⁸Dagen etter kom filistarane og vilde rana det dei falne hadde på seg. Då fann dei Saul og dei tri sønene hans liggjande på Gilboafjellet.

⁹Dei hogg hovudet av han og rana våpni hans og sende dei ikring i Filistarlandet, alt medan dei bar ut fagnadbodet i avgudstempli deira og for folket.

¹⁰Våpni hans la dei i Astarte-templet, og lekamen hengde dei upp på muren i Betsan.

¹¹Då mennene i Jabes i Gilead fekk spurt kva filistarane hadde gjort med Saul,

¹²tok dei i veg, alle som våpnføre var, og gjekk heile natti; dei tok liki av Saul og sønene hans ned av muren i Betsan, for so til Jabes og brende dei der.

¹³Beini deira tok dei og gravla under tamariska i Jabes, og sidan heldt dei fasta i sju dagar.