Read nynorsk 1938 Fyrste Samuelsbok 8 Bible Online

Fyrste Samuelsbok 8 - nynorsk 1938 bible

Fyrste Samuelsbok 8

¹Då Samuel vart gamal, sette han sønene sine til domarar i Israel.

²Eldste son hans heitte Joel og den andre Abia; dei skifte rett i Be'erseba.

³Men sønene hans fylgde ikkje i hans fotfar; dei søkte berre sin eigen bate og tok mutor og rengde retten.

⁴Då kom dei i hop alle styresmennene i Israel og for til Samuel i Rama

⁵og sa til han: No hev du teke til å eldast, og sønene dine fylgjer ikkje i dine fotfar. So set no ein konge yver oss til å styra oss! Det hev då alle hine folki.

⁶Då dei sa det ordet: Gjev oss ein konge, som kann styra oss! tykte Samuel vondt, og han bad til Herren.

⁷Men Herren sa til Samuel: Lyd du folket og gjer alt det dei bed deg um! For det er ikkje deg dei hev vanda; det er meg dei hev vanda og ikkje vil hava til konge yver seg.

⁸So hev dei alltid gjort frå den dagen eg førde dei upp frå Egyptarland, og til denne dag - dei vende seg frå meg og tente andre gudar; og so fer dei no åt mot deg og.

⁹Gjer no som dei vil! Men fyrst lyt du vara dei ålvorleg og segja dei greidt korleis han kjem til å fara åt den kongen som skal råda yver dei.

¹⁰Då tala Samuel til folket som kravde ein konge av han, og gjorde kunnigt for dei alt det Herren hadde sagt.

¹¹Han sa: Soleis kjem han til å bera seg åt den kongen som skal råda yver dykk: Sønene dykkar tek han og set til å stella med vogni og hestane sine, og dei lyt springa fyre vogni hans.

¹²Han set dei til hovdingar yver tusund mann og yver femti mann og til å pløgja åkrane hans og hausta inn avlingi hans og til å laga stridsvåpen og køyregreidor åt han.

¹³Døtterne dykkar tek han og set til å laga kryddesalve og til å koka og baka åt han.

¹⁴Dei beste gjordi og vinhagane og oljehagane dykkar tek han og gjev tenarane sine.

¹⁵Av åkrane og vinhagane dykkar tek han tiend og gjev hirdmennene og tenarane sine.

¹⁶Drengene og tenestgjentone dykkar og dei likaste unggutane dykkar og asni dykkar tek han og hev dei til å arbeida for seg.

¹⁷Av småfeet dykkar tek han tiend, og sjølve vert de trælane hans.

¹⁸Då kjem de ein dag til å ropa til Herren for den kongen skuld som de hev kåra dykk; men den dagen svarar han dykk ikkje.

¹⁹Men folket vilde ikkje høyra på Samuel; dei sa: Nei, me vil hava ein konge yver oss.

²⁰Me vil hava det som alle hine folki hev det; og kongen vår skal skifta rett millom oss og ganga fyre oss i striden når me hev ufred.

²¹Då Samuel hadde høyrt alt det folket hadde å segja, bar han det fram for Herren.

²²Og Herren sa til Samuel: Gjer som dei vil og set ein konge yver dei! Då sa Samuel til Israels-mennene: Far heim att kvar til sin by!