Read nynorsk 1978 1. Mosebok 11 Bible Online

1. Mosebok 11 - nynorsk 1978 bible

1. Mosebok 11

¹Heile verda hadde eitt språk og same tungemålet.

²Då folk tok ut frå aust, fann dei ein brei dal i Sinear-landet, og der slo dei seg ned. [23]

³Dei sa til kvarandre: «Kom, lat oss laga teglstein og brenna han vel!» Dei bruka tegl til murstein og jordbek til kalk.

⁴Så sa dei: «Kom, lat oss byggja ein by med eit tårn som når opp til himmelen, og gjera oss namngjetne, så vi ikkje vert spreidde ut over heile jorda!»

⁵Då steig Herren ned og ville sjå på byen og tårnet som menneska bygde.

⁶Og Herren sa: «Sjå, dei er eitt folk, og alle har dei same tungemålet. Dette er det fyrste dei tek seg føre. No vert ikkje noko umogeleg for dei, kva dei så finn på å gjera.

⁷Lat oss stiga ned og vildra tungemålet deira, så den eine ikkje skjønar kva den andre seier!»

⁸Så spreidde Herren dei derifrå ut over heile jorda, og dei heldt opp med å byggja på byen.

⁹Difor kalla dei han Babel. For der vildra Herren tungemålet for heile verda, og derifrå spreidde han dei ut over all jorda. [24]

¹⁰Dette er etterkomarane etter Sem. Då Sem var 100 år, fekk han sonen Arpaksjad, to år etter storflaumen.

¹¹Og etter at han hadde fått Arpaksjad, levde han endå 500 år og fekk søner og døtrer.

¹²Då Arpaksjad var 35 år, fekk han sonen Sjelah.

¹³Og etter at han hadde fått Sjelah, levde han endå 403 år og fekk søner og døtrer.

¹⁴Då Sjelah var 30 år, fekk han sonen Eber.

¹⁵Og etter at han hadde fått Eber, levde han endå 403 år og fekk søner og døtrer.

¹⁶Då Eber var 34 år, fekk han sonen Peleg.

¹⁷Og etter at han hadde fått Peleg, levde han endå 430 år og fekk søner og døtrer.

¹⁸Då Peleg var 30 år, fekk han sonen Re’u.

¹⁹Og etter at han hadde fått Re’u, levde han endå 209 år og fekk søner og døtrer.

²⁰Då Re’u var 32 år, fekk han sonen Serug.

²¹Og etter at han hadde fått Serug, levde han endå 207 år og fekk søner og døtrer.

²²Då Serug var 30 år, fekk han sonen Nakor.

²³Og etter at han hadde fått Nakor, levde han endå 200 år og fekk søner og døtrer.

²⁴Då Nakor var 29 år, fekk han sonen Tarah.

²⁵Og etter at han hadde fått Tarah, levde han endå 119 år og fekk søner og døtrer.

²⁶Då Tarah var 70 år, fekk han sønene Abram, Nakor og Haran.

²⁷Dette er soga om Tarah og ætta hans. Tarah fekk sønene Abram, Nakor og Haran. Og Haran fekk sonen Lot.

²⁸Haran døydde hjå Tarah, far sin, i fedrelandet sitt, i Ur i Kaldea. [25]

²⁹Abram og Nakor tok seg koner. Kona til Abram heitte Sarai, og kona til Nakor heitte Milka. Ho var dotter til Haran. Han hadde døtrene Milka og Jiska.

³⁰Men Sarai var barnlaus; ho kunne ikkje få born.

³¹Tarah tok med seg Abram, son sin, og Lot Haransson, soneson sin, og Sarai, sonekona si, kona til Abram, og førte dei ut frå Ur i Kaldea og ville fara til Kanaan. Men då dei kom til Karan, slo dei seg ned der. [26]

³²Levetida hans Tarah vart 205 år. Så døydde Tarah i Karan.