Read nynorsk 1978 1. Mosebok 13 Bible Online

1. Mosebok 13 - nynorsk 1978 bible

1. Mosebok 13

¹Så fór Abram frå Egypt opp til Negev med kona si og alt det han åtte. Og Lot var med han.

²Abram var no svært rik, både på fe og på sølv og gull.

³Frå Negev fór Abram dagslei etter dagslei til dess han kom til Betel, til den staden der han før hadde hatt teltet sitt, mellom Betel og Ai.

⁴Der hadde han førre gongen bygt eit altar, og der kalla han på Herrens namn.

⁵Lot, som fylgdest med Abram, hadde òg småfe og storfe og telt.

⁶Men landet kunne ikkje fø dei når dei var i lag; dei hadde så mykje fe at dei ikkje kunne bu saman.

⁷Så vart det trette mellom dei som gjætte for Abram, og dei som gjætte for Lot. Kanaanearane og perisittane budde den gongen i landet.

⁸Då sa Abram til Lot: «Kjære, lat det ikkje vera trette mellom meg og deg og mellom mine gjætarar og dine! Vi er då frendar.

⁹Ligg ikkje heile landet framføre deg? Skil heller lag med meg! Tek du til venstre, skal eg ta til høgre; og tek du til høgre, skal eg ta til venstre.»

¹⁰Då såg Lot ut over landet og la merke til at heile Jordan-sletta, radt ned til Soar, var svært rik på vatn, som Herrens hage, som Egyptarlandet. Det var før Herren hadde lagt Sodoma og Gomorra i øyde. [29] [30]

¹¹Og Lot valde seg ut heile Jordan-sletta og tok austetter. Såleis skildest dei frå einannan.

¹²Abram vart buande i Kanaan, medan Lot slo seg ned i byane på sletta og flytte med telta sine heilt ned til Sodoma.

¹³Men folket i Sodoma var vondt og synda groveleg mot Herren.

¹⁴Herren sa til Abram etter at Lot hadde skilt lag med han: «Lyft augo og sjå deg ikring frå den staden der du står, mot nord og sør, mot aust og vest!

¹⁵For heile det landet du ser, vil eg gje deg og di ætt for alltid.

¹⁶Eg vil la ætta di verta som støvet på jorda. Kan nokon telja støvet på jorda, skal di ætt kunna teljast òg.

¹⁷Stå opp og far gjennom landet, så langt og så breitt som det er! For deg vil eg gje det.»

¹⁸Sidan flytte Abram ikring med telta sine. Han kom til eikelunden i Mamre ved Hebron. Der vart han buande, og der bygde han eit altar for Herren.