Read nynorsk 1978 1. Mosebok 14 Bible Online

1. Mosebok 14 - nynorsk 1978 bible

1. Mosebok 14

¹På den tid Amrafel var konge i Sinear, Arjok konge i Ellasar, Kedor-Laomer konge i Elam og Tidal konge over Gojim,

²vart det ufred mellom desse kongane og Bera, kongen i Sodoma, Birsja, kongen i Gomorra, Sjinab, kongen i Adma, Sjemeber, kongen i Sebojim, og kongen i Bela, det som no heiter Soar.

³Alle desse slo seg saman og drog til Siddim-dalen, der Saltsjøen er no. [31]

⁴Tolv år hadde dei stått under Kedor-Laomer, men i det trettande reiste dei seg mot han.

⁵Og fjortande året kom Kedor-Laomer og dei kongane som var med han, og dei slo refaittane ved Asjterot-Karnajim, susittane ved Ham og emittane på Kirjatajim-sletta.

⁶Horittane slo dei på Se’ir-fjella og forfylgde dei heilt til El-Paran, som ligg utmed øydemarka.

⁷Så snudde dei og kom til Domskjelda, det er det same som Kadesj. Dei tok heile amalekittlandet og la under seg dei amorittane som budde i Haseson-Tamar.

⁸Kongane i Sodoma, Gomorra, Adma, Sebojim og Bela, som no heiter Soar, tok ut og fylka seg til strid mot dei i Siddim-dalen,

⁹mot Kedor-Laomer, kongen i Elam, Tidal, kongen over Gojim, Amrafel, kongen i Sinear, og Arjok, kongen i Ellasar, fire kongar mot fem.

¹⁰Men i Siddim-dalen var det fullt av jordbekgruver. Og då kongane i Sodoma og Gomorra laut røma, fall dei ned i gruvene. Dei som var att, rømde til fjells.

¹¹Så tok fiendane alt godset i Sodoma og Gomorra og all maten deira og drog bort.

¹²Og dei tok med seg Lot, brorson til Abram, og alt det han åtte, og drog av stad. Lot budde i Sodoma.

¹³Ein av dei som hadde sloppe unna, kom og fortalde dette til Abram, hebrearen. Han budde attmed eikelunden åt amoritten Mamre, bror til Esjkol og Aner. Dei hadde pakt med Abram.

¹⁴Då Abram fekk høyra at frenden hans var fanga, mønstra han alle dei våpenføre mennene som var fødde og fostra i huset hans, 318 i talet, og sette etter kongane heilt til Dan.

¹⁵Der delte han flokken sin og tok på dei om natta. Han vann over dei og forfylgde dei heilt til Hoba, som ligg nordanfor Damaskus.

¹⁶Så tok han att alt godset. Og Lot, frenden sin, og hans gods, tok han òg att, og like eins kvinnene og folket.

¹⁷Etter at Abram hadde vunne over Kedor-Laomer og dei kongane som var med han, tok han på heimveg. Då kom kongen i Sodoma imot han til Slettedalen, som no heiter Kongsdalen. [32]

¹⁸Og Melkisedek, kongen i Salem, kom ut med brød og vin. Han var prest for Den Høgste Gud. [33] [34]

¹⁹Han velsigna Abram og sa: «Velsigna vere Abram ¬av Den Høgste Gud, han som skapte himmel og jord!

²⁰Lova vere Den Høgste Gud, som har gjeve dine fiendar ¬i di hand!» Så gav Abram han tiend av alt.

²¹Kongen i Sodoma sa til Abram: «Gjev meg folket, og ta du godset!»

²²Men Abram svara: «Eg retter opp handa til Herren, Den Høgste Gud, han som skapte himmel og jord:

²³Ikkje så mykje som ein tråd eller ei sandalreim tek eg imot av det som ditt er. Du skal ikkje ha det å seia at du gjorde Abram rik.

²⁴Eg vil berre ha att for den maten folket åt. Og så vil eg at dei mennene som var med meg, Aner, Esjkol og Mamre, skal få det dei har rett på.»