Read nynorsk 1978 1. Mosebok 15 Bible Online

1. Mosebok 15 - nynorsk 1978 bible

1. Mosebok 15

¹Ei tid etter at dette hadde hendt, kom Herrens ord til Abram i eit syn, og det lydde så: «Ver ikkje redd, Abram! Eg er ditt skjold; løna di skal verta overlag stor.»

²Men Abram svara: «Herre, min Gud, kva vil du gje meg? Barnlaus fer eg min veg, og Elieser frå Damaskus skal arva huset mitt.

³Meg har du ikkje gjeve born,» sa Abram, «og ein træl i huset mitt kjem til å arva meg.»

⁴Då kom Herrens ord til Abram, og det lydde så: «Nei, han skal ikkje arva deg, men din eigen son skal verta arvingen din.»

⁵Så tok Herren han med seg ut og sa til han: «Sjå opp mot himmelen og tel stjernene, om du kan! Så tallaus skal ætta di verta.»

⁶Abram trudde Herren, og difor rekna Herren han for rettferdig.

⁷Så sa han til han: «Eg er Herren, som førte deg ut frå Ur i Kaldea og ville gje deg dette landet til eige.»

⁸Abram sa: «Herre, min Gud, korleis kan eg vita at eg skal få det til eige?»

⁹Då svara han: «Henta meg ei treårs kvige, ei treårs geit og ein treårs ver, ei turteldue og ein dueunge!»

¹⁰Abram henta alt dette til han, skar dyra midt i to og la det eine stykket av kvart dyr beint imot det andre. Men fuglane skar han ikkje sund.

¹¹Rovfuglar slo ned på dei daude dyra, men Abram jaga dei bort.

¹²Då sola heldt på å glada, kom det ein tung svevn på Abram. Redsle kom over han — eit stort mørker.

¹³Og Gud sa til han: «Det skal du vita, at etterkomarane dine skal halda til i eit land som ikkje er deira. Dei skal træla for folket der og tola mykje vondt av det i fire hundre år.

¹⁴Men det folket dei må træla for, vil eg òg døma, og sidan skal dei dra ut med mykje gods.

¹⁵Og du skal fara i fred til fedrane dine; i ein god alderdom skal du gå i grav.

¹⁶I fjerde ættleden skal dei koma hit att; for syndeskulda åt amorittane har enno ikkje fylt sitt mål.»

¹⁷Då sola var gladd, og det var stummande mørkt vorte, synte det seg ein rykande omn og ein logande eld som fór fram mellom kjøtstykka. [35]

¹⁸Den dagen gjorde Herren ei pakt med Abram og sa: «Di ætt gjev eg dette landet, frå Egyptarelva til Storelva, til Eufrat, [36]

¹⁹landet åt kenittane, kenisittane, kadmonittane,

²⁰hetittane, perisittane, refaittane,

²¹amorittane, kanaanearane, girgasjittane og jebusittane.»