Read nynorsk 1978 1. Mosebok 16 Bible Online

1. Mosebok 16 - nynorsk 1978 bible

1. Mosebok 16

¹Sarai, kona til Abram, fekk ikkje born. Men ho hadde ei egyptisk trælkvinne som heitte Hagar.

²Sarai sa til Abram: «Du veit, Herren har ikkje vilja la meg få born. Gå inn til trælkvinna mi! Kan henda ho får ein son til meg.» Og Abram gjorde som Sarai sa.

³Etter at Abram hadde butt ti år i Kanaan, tok Sarai, kona hans, trælkvinna si, Hagar frå Egypt, og lét mannen sin, Abram, få henne til kone.

⁴Han låg med Hagar, og ho vart med barn. Men då ho såg at ho var med barn, vanvørde ho matmor si.

⁵Då sa Sarai til Abram: «Du skal svara for den urett eg lid. Eg har sjølv late deg ta trælkvinna mi i fang. Men no, når ho ser at ho er med barn, vanvørder ho meg. Herren skal døma mellom meg og deg!»

⁶Då sa Abram til Sarai: «Du rår sjølv over trælkvinna di. Gjer med henne som du synest!» Sidan var Sarai hard med henne; og ho rømde sin veg.

⁷Herrens engel fann henne attmed ei kjelde i øydemarka, attmed kjelda på vegen til Sjur. [37]

⁸Og han sa: «Hagar, trælkvinna hennar Sarai, kvar kjem du frå, og kvar skal du av?» Ho svara: «Eg har rømt frå Sarai, matmor mi.»

⁹Då sa Herrens engel til henne: «Gå heim att til matmor di, og bøy deg under handa hennar!»

¹⁰Og han heldt fram: «Stor vil eg gjera ætta di; reint uteljande skal ho verta.»

¹¹Så sa Herrens engel til henne: «No er du med barn, og du skal få ein son; han skal du kalla Ismael, for Herren har høyrt ¬kva du leid. [38]

¹²Han skal verta eit villesel til kar. Hans hand skal vera vend ¬mot alle og alle hender mot han; beint framfor alle sine frendar skal han slå seg ned.»

¹³Då kalla ho Herren, som hadde tala til henne: «Du er Gud som ser.» For ho sa: «Kan det vera råd at eg her har sett skimten av han som ser meg?»

¹⁴Difor kallar dei den brunnen Lakai-Ro’i-brunnen. Han ligg mellom Kadesj og Bered. [39]

¹⁵Abram fekk ein son med Hagar, og han kalla sonen som han hadde fått med henne, Ismael.

¹⁶Abram var 86 år gamal då han fekk Ismael med Hagar.