Read nynorsk 1978 1. Mosebok 17 Bible Online

1. Mosebok 17 - nynorsk 1978 bible

1. Mosebok 17

¹Då Abram var 99 år gamal, synte Herren seg for han og sa: [40] «Eg er Gud ¬Den Allmektige. Lev for mitt åsyn, ver heil i di ferd!

²Eg vil skipa ei pakt mellom meg og deg og gjera ætta di uhorveleg stor.»

³Då kasta Abram seg ned med andletet mot jorda, og Gud sa til han:

⁴«Sjå, eg gjer ei pakt med deg, du skal verta far til mange folk.

⁵Du skal ikkje lenger ¬heita Abram, men Abraham ¬skal namnet ditt vera; for eg gjer deg til far ¬åt mange folk. [41]

⁶Eg lèt deg veksa og aukast og gjer deg til folkeslag; kongar skal gå ut frå deg.

⁷Eg skipar ei pakt mellom meg og deg og etterkomarane dine, frå ættled til ættled, ei evig pakt. Eg vil vera Gud for deg og for ætta di etter deg.

⁸Og eg vil gje deg og ætta di etter deg det landet du no held til i, heile Kanaan-landet, til eige i all æve; og eg vil vera deira Gud.»

⁹Så sa Gud til Abraham: «Du skal halda pakta mi, både du og etterkomarane dine, frå ættled til ættled.

¹⁰Dette er pakta de skal halda, pakta mellom meg og dykk og etterkomarane dine: Alle menn og gutar hjå dykk skal omskjerast.

¹¹De skal la førehuda dykkar verta avskoren, og det skal vera teiknet på pakta mellom meg og dykk.

¹²I ætt etter ætt skal kvart gutebarn hjå dykk omskjerast når det er åtte dagar gamalt, både dei som er fødde i huset, og dei som er kjøpte for pengar hjå framande, som ikkje er av di ætt.

¹³Omskjerast skal både dei som er fødde i huset ditt, og dei du har kjøpt for pengar. Såleis skal pakta mi syna seg på kroppen deira, ei evig pakt.

¹⁴Men den som ikkje er omskoren, den som ikkje har fått førehuda avskoren, den mannen skal rydjast ut or folket sitt; for han har brote mi pakt.»

¹⁵Og Gud sa til Abraham: «Sarai, kona di, skal du ikkje lenger kalla Sarai; Sara skal ho heita. [42]

¹⁶Eg vil velsigna henne og gje deg ein son med henne òg. Ja, eg vil velsigna henne, og ho skal verta mor til mange folk; kongar over folkeslag skal ættast frå henne.»

¹⁷Då kasta Abraham seg til jorda og lo. Og han sa med seg sjølv: «Kan ein mann som er hundre år, få barn? Og Sara, som er nitti år, kan ho verta mor?»

¹⁸Og Abraham sa til Gud: «Gjev Ismael må få leva for ditt åsyn!»

¹⁹Men Gud sa: «Nei, Sara, kona di, skal få ein son, og du skal kalla han Isak. Eg vil gjera mi pakt med han, ei evig pakt for ætta hans etter han.

²⁰Og bøna di for Ismael har eg høyrt. Eg vil velsigna han og la han få mange etterkomarar og ei stor ætt. Tolv hovdingar skal han verta far til, og eg vil gjera han til eit stort folk.

²¹Men pakta mi vil eg gjera med Isak, som Sara skal få til års på denne tid.»

²²Då Gud var ferdig med å tala til Abraham, fór han opp frå han.

²³Same dagen tok Abraham Ismael, son sin, og alle mennene i huset sitt, både dei som var fødde i huset, og dei som var kjøpte for pengar, og skar av førehuda på dei, som Gud hadde sagt.

²⁴Abraham var 99 år gamal då han vart omskoren.

²⁵Og Ismael, son hans, var 13 år då han vart omskoren.

²⁶Same dagen vart dei omskorne, Abraham og Ismael, son hans.

²⁷Og alle mennene i huset hans, både dei som var fødde i huset, og dei som var kjøpte hjå framande, vart omskorne saman med han.