Read nynorsk 1978 1. Mosebok 30 Bible Online

1. Mosebok 30 - nynorsk 1978 bible

1. Mosebok 30

¹Då Rakel såg at ho og Jakob ikkje fekk born, vart ho avundsjuk på syster si og sa til Jakob: «Lat meg få born! Elles døyr eg.»

²Då vart Jakob harm på Rakel og sa: «Er eg i Guds stad? Det er han som har nekta deg born.»

³Då sa ho: «Der er Bilha, trælkvinna mi. Gå inn til henne! Ho kan føda på knea mine og hjelpa meg òg til born.» [72]

⁴Så gav ho han Bilha, trælkvinna si, til kone, og Jakob låg med henne.

⁵Bilha vart med barn og fekk ein son med Jakob.

⁶Då sa Rakel: «Gud har hjelpt meg til retten min. Han har høyrt bøna mi og gjeve meg ein son!» Så kalla ho han Dan. [73]

⁷Sidan vart Bilha, trælkvinna åt Rakel, med barn att og fekk ein son til med Jakob.

⁸Då sa Rakel: «Overmenneskelege stridar har eg stridt med syster mi, og eg har vunne.» Så kalla ho han Naftali. [74]

⁹Då Lea såg at ho ikkje fekk fleire born, tok ho Silpa, trælkvinna si, og gav Jakob til kone.

¹⁰Og Silpa, trælkvinna åt Lea, fekk ein son med Jakob.

¹¹Då sa Lea: «For ei lukke!» Så kalla ho han Gad. [75]

¹²Sidan fekk Silpa, trælkvinna åt Lea, ein son til med Jakob.

¹³Då sa Lea: «Å sæle meg! For alle kvinner kjem til å prisa meg sæl.» Så kalla ho han Asjer. [76]

¹⁴Ein dag i kveiteskurden gjekk Ruben ut på marka. Der fann han alruner, og han tok dei med heim til Lea, mor si. Då sa Rakel til Lea: «Gjev meg nokre av alrunene åt son din!» [77]

¹⁵Lea svara: «Er det ikkje nok at du har teke mannen min? Vil du ta alrunene åt son min òg?» Då sa Rakel: «Får eg alrunene, kan Jakob liggja med deg i natt.»

¹⁶Då Jakob kom heim frå marka om kvelden, gjekk Lea til møtes med han og sa: «Det er meg du skal koma til; eg har kjøpt deg for dei alrunene som son min fann.» Så låg han med henne den natta.

¹⁷Og Gud høyrde bøna hennar Lea. Ho vart med barn og fekk den femte sonen med Jakob.

¹⁸Då sa Lea: «Gud har gjeve meg løn, fordi eg lét mannen min få trælkvinna mi.» Så kalla ho han Jissakar. [78]

¹⁹Sidan vart Lea med barn att og fekk den sjette sonen med Jakob.

²⁰Då sa Lea: «Gud har gjeve meg ei god gåve. No kjem mannen min til å halda seg til meg, fordi han har fått seks søner med meg.» Så kalla ho han Sebulon. [79]

²¹Sidan fekk ho ei dotter og kalla henne Dina.

²²Då kom Gud Rakel i hug. Han høyrde bønene hennar og opna morslivet hennar,

²³så ho vart med barn og fekk ein son. Då sa ho: «Gud har teke bort vanæra mi.»

²⁴Og ho kalla han Josef; for ho sa: «Gjev Herren ville la meg få ein son til!» [80]

²⁵Då Rakel hadde fått Josef, sa Jakob til Laban: «Lat meg fara, så eg kan koma heim til mitt eige land!

²⁶Gjev meg konene og borna mine, som eg har tent for, så eg kan fara! For du veit sjølv korleis eg har tent deg.»

²⁷Då sa Laban: «Hadde du berre godvilje for meg! Eg har fått eit varsel om at det er for di skuld Herren har velsigna meg.

²⁸Sei kva du vil ha i løn,» sa han, «så skal eg gje deg det!»

²⁹Jakob svara: «Du veit sjølv korleis eg har tent deg, og kva buskapen din har vorte til medan eg har stelt han.

³⁰For det var lite du hadde før eg kom, men no har det auka til ei stor mengd. Herren har velsigna deg for kvart steg eg tok. Men når skal eg få syta for mitt eige hus?»

³¹Då sa Laban: «Kva skal eg gje deg?» Jakob svara: «Du skal ikkje gje meg nokon ting. Men vil du gjera som eg seier, skal eg halda fram med å gjæta småfeet ditt og sjå etter det.

³²I dag skal eg gå gjennom heile buskapen din og skilja ut alle flekkete og spreklete dyr, alle dei svarte sauene og dei flekkete og spreklete geitene. Det skal vera løna mi.

³³Ærlegdomen min skal vitna for meg når du sidan kjem og ser over løna mi. Finst det hjå meg ei geit som ikkje er flekket eller spreklet, og ein sau som ikkje er svart, så er dei stolne.»

³⁴Då svara Laban: «Godt, lat det vera som du seier!»

³⁵Men same dagen skilde han ut dei bukkane som var stripete og spreklete, og alle geitene som var flekkete og spreklete, alle som det var noko kvitt på, og alle dei svarte sauene. Og han lét sønene sine ta vare på dei.

³⁶Så heldt Laban seg tre dagsreiser frå Jakob, medan Jakob gjætte resten av småfeet hans.

³⁷No fann Jakob seg friske stavar av kvitpoppel, mandeltre og platan og flekte borken av dei i striper, så den kvite veden kom til synes.

³⁸Så sette han stavane som han hadde flekt borken av, opp i vasstrørne, i rennene, der småfeet kom og drakk — beint framfor dyra; for dei para seg når dei kom og drakk.

³⁹No para småfeet seg attmed stavane og fekk stripete, flekkete og spreklete ungar.

⁴⁰Jakob skilde lamma ifrå, og han lét småfeet venda hovudet mot dei stripete og svarte dyra i buskapen åt Laban. Såleis fekk han seg eigne flokkar, som han ikkje sleppte saman med småfeet åt Laban.

⁴¹Kvar gong det var sterke dyr som para seg, sette Jakob stavar i rennene, midt for augo på dei, så dei skulle para seg attmed stavane.

⁴²Men var det veike dyr, sette han ikkje stavane der. På den måten fekk Laban dei veike dyra, men Jakob fekk dei sterke.

⁴³Difor vart mannen svært rik. Han fekk ei mengd med småfe, trælkvinner og trælar, kamelar og esel.