Read nynorsk 1978 1. Mosebok 35 Bible Online

1. Mosebok 35 - nynorsk 1978 bible

1. Mosebok 35

¹Gud sa til Jakob: «Gjer deg ferdig, far opp til Betel og slå deg ned der! Der skal du byggja eit altar for Gud, som synte seg for deg då du rømde for Esau, bror din.»

²Då sa Jakob til husfolket sitt og til alle dei som var med han: «Få bort dei framande gudane som finst hjå dykk, reinsa dykk og skift klede!

³Så skal vi ta ut og fara til Betel. Der vil eg byggja eit altar for Gud, som høyrde bøna mi den gongen eg var i fare, og som var med meg på ferda mi.»

⁴Då lét dei Jakob få alle dei framande gudane dei hadde hjå seg, og ringane som dei hadde i øyro. Og Jakob grov det ned under den eika som står bortmed Sikem.

⁵Så tok dei ut, og ei redsle frå Gud kom over byane der ikring, så ingen sette etter Jakobs-sønene.

⁶Jakob kom til Lus i Kanaan — no heiter staden Betel — både han og alt folket som var med han.

⁷Der bygde han eit altar og kalla staden El-Betel; for der hadde Gud synt seg for han då han rømde for bror sin.

⁸Då døydde Debora, fostermor hennar Rebekka, og ho vart gravlagd nedanfor Betel, under den store eika; den kalla dei Gråte-eika.

⁹Endå ein gong synte Gud seg for Jakob, etter at han var komen heim frå Mesopotamia, og velsigna han.

¹⁰Og Gud sa til han: «No heiter du Jakob. Men du skal ikkje lenger ¬heita Jakob; Israel skal namnet ditt vera.» Såleis fekk han namnet Israel.

¹¹Og Gud sa til han: «Eg er Gud Den Allmektige. Du skal veksa og aukast! Eit folk, ja, mange folkeslag skal ættast frå deg, og kongar skal ha sitt opphav ¬i deg.

¹²Og det landet som eg gav Abraham og Isak, det gjev eg deg og ætta di etter deg.»

¹³Så fór Gud opp frå han, frå den staden der han hadde tala med han.

¹⁴Jakob reiste ein minnestein der Gud hadde tala med han. Og han auste drikkoffer på steinen og slo olje over han.

¹⁵Og Jakob kalla den staden der Gud hadde tala med han, Betel.

¹⁶Så tok dei ut frå Betel. Då dei endå hadde eit stykke att til Efrat, fekk Rakel eit barn. Det var ei hard fødsle. [93]

¹⁷Medan ho låg i hardaste riene, sa jordmora til henne: «Ver ikkje redd! Denne gongen òg får du ein son.»

¹⁸Med det same ho anda ut — for det kosta henne livet — kalla ho han Ben’oni. Men faren gav han namnet Benjamin. [94]

¹⁹Rakel døydde og vart gravlagd attmed vegen til Efrat, det er Betlehem.

²⁰Og Jakob reiste ein minnestein på grava hennar. Det er gravsteinen hennar Rakel, som står der den dag i dag.

²¹Så tok Israel ut att og sette opp teltet sitt bortanfor Migdal-Eder.

²²Medan Israel budde der i landet, hende det at Ruben gjekk stad og låg med Bilha, fylgjekona åt far sin. Og Israel fekk vita det. Jakob hadde tolv søner.

²³Sønene til Lea var Ruben, eldste son til Jakob, Simeon, Levi, Juda, Jissakar og Sebulon.

²⁴Sønene til Rakel var Josef og Benjamin.

²⁵Sønene til Bilha, trælkvinna åt Rakel, var Dan og Naftali.

²⁶Og sønene til Silpa, trælkvinna åt Lea, var Gad og Asjer. Dette var dei sønene Jakob fekk i Mesopotamia.

²⁷Jakob kom til Isak, far sin, i Mamre ved Kirjat-Arba, som no heiter Hebron, der Abraham og Isak hadde halde til. [95]

²⁸Levetida hans Isak vart 180 år.

²⁹Så drog Isak sitt siste andedrag og døydde. Han fór til folket sitt, gamal og mett av dagar. Og Esau og Jakob, sønene hans, gravla han.