Read nynorsk 1978 1. Mosebok 4 Bible Online

1. Mosebok 4 - nynorsk 1978 bible

1. Mosebok 4

¹Adam levde saman med Eva, kona si, og ho vart med barn og fødde Kain. Då sa ho: «Eg har fått ein gut av Herren.» [12]

²Sidan fekk ho Abel, bror hans. Abel vart sauegjætar, Kain vart jordbrukar. [13]

³Då det leid av ei tid, hende det at Kain bar fram for Herren eit offer av grøda på marka.

⁴Abel bar fram offer, han òg; han gav av dei fyrstefødde lamma i saueflokken sin og feittet deira. Herren såg med velvilje på Abel og hans offergåve,

⁵men ansa ikkje Kain og gåva hans. Då vart Kain brennande harm og stirte nedfor seg.

⁶Herren sa til Kain: «Kvifor er du harm, og kvifor stirer du ned for deg?

⁷Korleis er det? Har du godt i tankar, kan du lyfta augo. Men har du ikkje godt i tankar, ligg synda framfor døra og lurer. Ho trår etter deg, men du skal halda henne i age.»

⁸Sidan sa Kain til Abel, bror sin: «Kom, lat oss gå ut på marka!» Og medan dei var der ute, rauk Kain på Abel, bror sin, og slo han i hel.

⁹Då sa Herren til Kain: «Kvar er Abel, bror din?» Han svara: «Eg veit ikkje. Skal eg vakta bror min?»

¹⁰Då sa Herren: «Kva er det du har gjort? Høyr, blodet åt bror din ropar til meg frå jorda!

¹¹No skal du vera bannlyst frå den jord som opna munnen og tok imot blodet åt bror din frå di hand.

¹²Når du dyrkar marka, skal ho ikkje meir gje deg si grøde. Heimlaus og fredlaus skal du vera på jorda.»

¹³Då sa Kain til Herren: «Straffa mi er så stor at eg ikkje kan bera henne.

¹⁴Sjå, i dag driv du meg bort frå landet. Eg må gøyma meg for deg og vera heimlaus og fredlaus på jorda, og den som finn meg, kjem til å slå meg i hel.»

¹⁵Men Herren sa til han: «Nei! Slår nokon Kain i hel, skal det hemnast sju gonger.» Og Herren sette eit merke på Kain, så ingen som møtte han, skulle drepa han. [14]

¹⁶Så drog Kain bort frå Herren og busette seg i landet Nod, austanfor Eden. [15]

¹⁷Kain levde saman med kona si, og ho vart med barn og fødde Hanok. Kain bygde ein by og kalla han Hanok etter son sin.

¹⁸Hanok fekk sonen Irad, og Irad vart far til Mehujael. Mehujael fekk sonen Metusjael, og Metusjael vart far til Lamek.

¹⁹Lamek tok seg to koner. Den eine heitte Ada, den andre heitte Silla.

²⁰Ada fekk sonen Jabal. Han vart ættefar til dei som bur i telt og held buskap.

²¹Bror hans heitte Jubal. Han vart ættefar til alle dei som spelar på lyre og fløyte.

²²Silla fekk òg ein son, Tubalkain. Han smidde alle slag reiskapar av bronse og jern. Syster til Tubalkain var Na’ama.

²³Lamek sa til konene sine: «Ada og Silla, høyr mi røyst, Lameks koner, lyd på mine ord: Ein mann drep eg for kvart sår og ein gut for kvar skråme ¬eg får.

²⁴Kain skal hemnast sju gonger, men Lamek syttisju gonger.»

²⁵Adam kom saman med kona si att, og ho fekk ein son og kalla han Set. «For Gud har gjeve meg ¬ein annan son og sett han i staden for Abel, sidan Kain slo han i hel.»

²⁶Set fekk òg ein son og kalla han Enosj. På den tid tok dei til å kalla på Herrens namn.