Read nynorsk 1978 1. Mosebok 40 Bible Online

1. Mosebok 40 - nynorsk 1978 bible

1. Mosebok 40

¹Ei tid etter hende det at skjenkjaren og bakaren åt kongen i Egypt forsåg seg mot herren sin, egyptarkongen.

²Då vart farao harm på dei to hoffmennene sine, skjenkjarmeisteren og bakarmeisteren.

³Og han sette dei fast hjå hovdingen over livvakta, i fengslet der Josef var fange.

⁴Hovdingen over livvakta sette Josef til å sjå etter dei, og han var ein trufast tenar for dei. Dei vart sitjande der i fengslet ei tid.

⁵Ein gong hadde dei kvar sin draum, dei to, skjenkjaren og bakaren åt kongen i Egypt, der dei sat innestengde i fengslet. Ei og same natta drøymde dei, og draumane deira hadde kvar si meining.

⁶Då Josef kom inn til dei om morgonen, såg han det på dei at dei var i ulag.

⁷Då tala han med hoffmennene åt farao, som sat i varetekt saman med han hjå herren hans, og spurde: «Kvifor er de så sturne i dag?»

⁸Dei svara: «Vi har drøymt, og her er ingen som kan tyda draumane våre.» Då sa Josef til dei: «Det er Gud som rår for tyding av draumar. Sei meg kva de har drøymt!»

⁹Så fortalde skjenkjarmeisteren Josef draumen sin. Han sa: «Eg såg så klårt eit vintre framfor meg.

¹⁰Det var tre greiner på det, og så snart det tok til å skyta knuppar, spratt blomane, og klasane mogna til druer.

¹¹Eg heldt staupet åt farao i handa. Så tok eg druene, pressa utor dei opp i staupet og rette det til farao.»

¹²Då sa Josef: «Dette er så å tyda: Dei tre greinene er tre dagar.

¹³Om tre dagar skal farao opphøgja deg og setja deg inn att i stillinga di. Du skal retta staupet til farao, som du gjorde før, då du var skjenkjaren hans.

¹⁴Gjev du ville koma meg i hug, når det går deg godt! Gjer vel og tal om meg til farao, så eg kan koma ut or dette huset!

¹⁵For eg er stolen frå Hebrear-landet, og her har eg ikkje gjort noko som dei skulle setja meg i fengsel for.»

¹⁶Då bakarmeisteren såg at Josef hadde gjeve så god ei tyding, sa han til han: «Eg òg hadde ein draum. Eg tykte eg bar tre korger med kveitebrød på hovudet.

¹⁷I den øvste korga var det allslags kaker, som var baka åt farao. Men fuglane åt dei or korga på hovudet mitt.»

¹⁸Josef svara: «Dette er så å tyda: Dei tre korgene er tre dagar.

¹⁹Om tre dagar skal farao opphøgja deg; han skal hengja deg i eit tre, og fuglane skal eta kjøtet av kroppen din.»

²⁰Tredje dagen — det var fødselsdagen til farao — heldt han eit gjestebod for alle mennene sine. Då opphøgde han skjenkjarmeisteren og bakarmeisteren midt imellom mennene sine.

²¹Skjenkjarmeisteren sette han inn att i stillinga hans, så han fekk retta staupet til farao,

²²og bakarmeisteren hengde han. Det gjekk som Josef hadde sagt då han tydde draumane deira.

²³Men skjenkjarmeisteren tenkte ikkje meir på Josef; han gløymde han.