Read nynorsk 1978 2. Samuelsbok 4 Bible Online

2. Samuelsbok 4 - nynorsk 1978 bible

2. Samuelsbok 4

¹Då son til Saul fekk høyra at Abner hadde mist livet i Hebron, seig han reint i hop, og heile Israel var avskræmt.

²No hadde Sauls-sonen to menn som var hovdingar for herjeflokkar. Den eine heitte Ba’ana og den andre Rekab. Dei var sønene til Rimmon frå Be’erot og høyrde Benjamins-ætta til. For Be’erot vart òg rekna til Benjamin.

³Men folket i Be’erot hadde rømt til Gittajim, der dei har butt til denne dag.

⁴Jonatan, son til Saul, hadde ein son som var lam i føtene. Han var fem år gamal då ulukkemeldinga om Saul og Jonatan kom frå Jisre’el. Fostermora tok han med seg og rømde; men då ho skunda seg av stad, datt han ned og vart lam. Han heitte Mefibosjet. [7]

⁵Sønene til Rimmon frå Be’erot, Rekab og Ba’ana, tok ut og kom til huset åt Isjbosjet midt på heitaste dagen, medan han låg og kvilte middag.

⁶Den kvinna som vakta huset, hadde sete og sikta kveite. Men ho hadde vorte trøytt og sovna, så Rekab og Ba’ana, bror hans, slapp usedde framom.

⁷Dei kom inn i huset medan han låg på senga i soveromet sitt, slo han i hel og hogg hovudet av han. Det tok dei med seg, og så gjekk dei heile natta gjennom Jordan-dalen.

⁸Dei kom til David i Hebron med hovudet åt Isjbosjet og sa til kongen: «Sjå, her er hovudet åt Isjbosjet, son til Saul, han som var fienden din og stod deg etter livet. I dag har Herren gjeve deg hemn over Saul og ætta hans, herre konge.»

⁹Men David svara Rekab og Ba’ana, bror hans, sønene til Rimmon frå Be’erot: «Så sant Herren lever, han som har fria meg ut or all naud:

¹⁰Den mannen som kom til meg med melding om at Saul var død, meinte sjølv at han kom med gledebod. Men eg greip han og drap han i Siklag; det var den løna eg gav han for gledebodet.

¹¹Og no, når ugjerningsmenn har drepe ein rettvis mann i hans eige hus og hans eiga seng, skulle eg ikkje då krevja dykk til rekneskap for hans død og rydja dykk ut or landet?»

¹²Så tala David med mennene sine, og dei drap Rimmon-sønene og hogg hendene og føtene av dei og hengde dei opp ved Hebron-dammen. Men hovudet åt Isjbosjet tok dei og gravla i Abners grav i Hebron.