Read nynorsk 1978 1. Kongebok 4 Bible Online

1. Kongebok 4 - nynorsk 1978 bible

1. Kongebok 4

¹Salomo var konge over heile Israel.

²Dette var dei øvste embetsmennene hans: Asarja, son til Sadok, var prest;

³Elihoref og Akia, sønene til Sjisja, var riksskrivarar; Josjafat, son til Akilud, var kanslar;

⁴Benaja, son til Jojada, var hærførar; Sadok og Abjatar var prestar;

⁵Asarja, son til Natan, var hovding over futane; Sabud, son til Natan, var kongsven;

⁶Akisjar var slottshovding; Adoniram, son til Abda, hadde tilsyn med dei som gjorde pliktarbeid.

⁷Salomo sette tolv futar over heile Israel. Dei skulle syta for mat og drikke til kongen og hoffet hans. Kvar sin månad i året skulle dei syta for det.

⁸Dette er namna deira: son til Hur, i Efraims-fjellet;

⁹son til Deker, i Makas, Sja’albim, Bet-Sjemesj, Elon og Bet-Hanan; [7]

¹⁰son til Hesed, i Arubbot — han hadde Soko og heile Hefer-bygda; [8]

¹¹son til Abinadab hadde heile Dor-høglandet — han var gift med Tafat, dotter til Salomo; [9]

¹²Ba’ana, son til Akilud, hadde Ta’anak, Megiddo og heile Bet-Sjean, som ligg ved Saretan, nedanfor Jisre’el, frå Bet-Sjean til Abel-Mehola og bortom Jokmeam;

¹³son til Geber i Ramot i Gilead — han hadde teltbyane åt Ja’ir, son til Manasse, i Gilead, og Argob-bygda i Basan, seksti store byar med murar og bronsebommar;

¹⁴Akinadab, son til Iddo, hadde Mahanajim;

¹⁵Akima’as hadde Naftali — han òg var gift med ei av døtrene til Salomo, Basmat;

¹⁶Ba’ana, son til Husjai, i Asjer og Alot;

¹⁷Josjafat, son til Paruak, i Jissakar;

¹⁸Sjimi, son til Ela, i Benjamin;

¹⁹Geber, son til Uri, i Gilead, det landet som amorittkongen Sihon og Basan-kongen Og hadde hatt; dessutan var det ein fut i Juda.

²⁰Folket i Juda og Israel var tallaust som sanden på havsens strand. Dei åt og drakk og var glade.

²¹Salomo rådde over alle kongerika frå Eufrat til Filistarlandet og heilt til grensa mot Egypt. Dei svara skatt og stod under han så lenge han levde.

²²Til hushaldet hjå Salomo gjekk det kvar dag med tretti kor kveitemjøl og seksti kor anna mjøl,

²³ti gjødde oksar, tjue oksar som hadde gått på beite, og hundre sauer, forutan hjortar, gasellar, dådyr og gjødde gjæser.

²⁴Han rådde over alt land vestanfor Eufrat, frå Tifsah til Gasa, over alle kongane vestanfor Eufrat, og hadde fred på alle kantar. [10]

²⁵I Juda og Israel, frå Dan til Be’er-Sjeba, sat kvar mann trygt under sitt vintre og sitt fikentre så lenge Salomo levde.

²⁶Salomo hadde tolv tusen hestfolk og stallrom til førti tusen vognhestar.

²⁷Dei tolv futane sytte kvar sin månad for mat og drikke til kong Salomo og alle som gjekk til hans bord; og dei lét det ikkje skorta på noko.

²⁸Bygget og halmen til hestane og arbeidsdyra førte dei dit det skulle vera, kvar etter som han var føresagd.

²⁹Gud gav Salomo visdom, stort skjøn og eit vit som femnde vidt, liksom sanden på havsens strand.

³⁰Salomo hadde større visdom enn alle austmennene og egyptarane. [11]

³¹Han var visare enn alle menneske, visare enn Etan av Esrah-ætta og Mahol-sønene Heman, Kalkol og Darda. Namnet hans var kjent mellom alle folkeslaga rundt ikring.

³²Salomo laga tre tusen ordtøke, og songane hans var eitt tusen og fem i talet.

³³Han tala om trea, frå sederen på Libanon til isopen som veks ut or muren, og han tala om fe og fuglar, krypdyr og fiskar.

³⁴Frå alle land kom det folk og ville høyra visdomen åt Salomo, frå alle kongar på jorda som hadde høyrt om visdomen hans.